राष्ट्रिय सहमतिया सरकार आवश्यक : वान
राष्ट्र संघया महासचिव वान कि मुनं नेपालय् ईलय् हे संविधान च्वयेत व माओवादी लडाकूतय् समायोजन व व्यवस्थापन जुइत राष्ट्रिय सरकार गठन जुसाः ग्वाहालि जुइगु खँ धयादीगु दु ।
'ईलय् हे न्हूगु संविधान जारी यायेत व माओवादी सेनाया दुजःतय् सफलतापूर्वक समायोजन व पुनर्स्थापना यायेत राष्ट्रिय सहमतिया सरकार वाञ्छनीय खनेदु' धकाः महासचिव वानं सुरक्षा परिषद्या बैठकय् नेपाः सम्बन्धी पेश यानादिगु प्रतिवेदनय् न्ह्यथनादीगु खः ।
वयेकलं उगु प्रतिवेदन मार्फत संविधान निर्माण प्रकृयाय् बः बीत नं नेपाःया राजनीतिक दलतय्त इनाप यानादिल । वयेकंल शान्ति सम्झौता प्रति आः तक नेपाःया सरकारं क्यंगु प्रतिवद्धताय् प्रशन्नता प्वंकादिसें थुकीयात कायम यानातयेत प्रोत्साहित यायेगु धयादिल ।
अथेहे रक्षामन्त्री विद्या भण्डारीं शान्ति सम्झौताया छुं बुँदात हिलेमाःगु खँ धयाच्वंगु ईलय् महासचिव वानं उकी असहमति प्वंकादिल । नापं सम्झौता पालना जू मजूगु बारे समीक्षा जुइमाःगु खँ नं प्रतिवेदनय् न्ह्यथंनातःगु दु । वयेकलं नेपाली सेनाया निंतिं गैरघातक ल्वाभः न्यायेगु मदुगु व न्हूगु भर्ती कायेगु मदुगु बुँदायात नं पालना यायेगु खँय् बः बियादिल ।
वयेकया प्रतिवेदनय् शिविरय् दुपिं अयोग्य माओवादी लडाकूतय्त शिविरं लिकायेगु ज्या सन्तोषजनक जुइमफुगु खँ नं न्ह्यथंनादीगु दु ।
