शान्ति प्रकृया सफल जुइगु राजपाक्षेया विश्वास
श्रीलंकाया राष्ट्रपति महिन्दा राजपाक्षें नेपालय् जारी शान्ति प्रकृया सफल जुइगु विश्वसा प्वंकादीगु दु ।
नेपाःया स्वन्हुन्यंकया भ्रमण क्वचायेकाः शनिवा: श्रीलंका लिहांझायेगु ईलय् त्रिभुवन अन्तराष्ट्रिय विमानस्थलय् संचारकर्मीत नाप खँल्हाबंला यानादिसें वयेकलं नेपाःया राजनीतिक स्थिति नाजुक जुसां बुद्ध बूगु देशय् शान्तिपूर्ण तरिकां राजनीतिक समस्या हल जुइगु धयादिल । वयेकलं थःगु नेपाः भ्रमणया झ्वलय् नापलापिं दक्वं नेपाःया नेतात शान्तिया पक्षय् दुगुलिं शान्तिपूर्ण तरिकां समस्या हल जुइगुलि थः विश्वस्त जूगु धयादिल ।
विशेष यानाः धार्मिक यात्राया निंतिं नेपाः झायादिम्ह राजपाक्षें लुम्बिनिया भ्रमण नापं नेपाःया राष्ट्रपति डा. रामवरण यादव, प्रधानमन्त्री माधवकुमार नेपाल, एनेकपा (माओवादी)या अध्यक्ष पुष्पकमल दाहाल 'प्रचण्ड' लगायत नेतातय्त नापलानादीगु खः ।
मौसम खराबीया कारणं शनिवाः सुथय् गुताः ईलय् स्वदेश लिहांवनेगु ज्याझ्व: दुगु खसां वयेक निघौ लिपा झिंछता ईलय् जक विशेष विमानं श्रीलंका लिहांझायादीगु खः ।
