'राजनीतिक दलत छप्पँ मजुसाः संविधान निर्माण असम्भव'

संविधान सभाया अध्यक्ष सुवाषचन्द्र नेम्वाङं राजनीतिक दलत छप्पँ जुयाः न्ह्यामवंसाः निर्धारित ईलय् संविधान निर्माण मजुइगु खँ धयादीगु दु ।

शनिवाः सुथय् पोखरा विमानस्थलय् पत्रकारत नाप खँल्हाबंला यानादिसें वयेकलं अन्तरिम संविधानय् दक्वं राजनीतिक दलत छप्पँ जुयाः न्हूगु संविधान जारी यायेमाःगु खँ च्वयातःगु न्ह्यथंनादिसें वयेकलं संविधान जारी यायेत राजनीतिक दलत मिलेजइमाःगु धयादिल । वयेकलं सहमति व सहकार्यया विकल्प मदुगुलिं ईलय् हे संविधान निर्माण मजुसाः देश अराजकता पाखे वनीगु ख्याच्वः बियादिल ।

पत्रकारतय्सं बजेट पास यायेत छिं थःगु विशेष अधिकार छ्यलाः दीलाः धकाः न्यंगु न्ह्यसलय् वयेकलं बजेत संसद पाखें हे पास जुइगु दाबी यानादिल ।