माओवादी आन्दोलन छुं न्हिया निंतिं जक : पोखरेल
नेकपा (एमाले)या महासचिव ईश्वर पोखरेलं एनेकपा (माओवादी)या आन्दोलन निन्हू प्यन्हूया निंतिं जक जुइगु खँ धयादीगु दु । वयेकलं सहमतिया विकल्प मदुगु धयादिसें माओवादी आन्दोलन ताः ई तक मन्ह्याइगु धयादिल ।
शनिवाः सुनसरीया इटहरीलय् संचारकर्मीत नाप खँल्हाबंला यानादिसें वयेकलं राजनीतिक गतिरोध ज्यंकेगु निंतिं सहमतिया बाहेक मेगू विकल्प मदुगु दाबी यानादिल । वयेकलं सहमतिया हे लँपूया माध्यमं उच्चस्तरीय राजनीतिक तह पाखें समस्या समाधन जुइगु धयादिल ।
बजेट अध्यादेश पाखें पारित मजुइगु व संसद पाखें हे स्वीकृत जुइगु दाबी यानादिसें एमाले महासचिव पोखरेलं निर्धारित ई स्वयां न्ह्यः सहमति जुयाः बहुमतं बजेट स्वीकृत जुइगु धयादिल । वयेकलं माओवादीं मुडभेडया राजनीति यात प्रश्रय ब्यूसाः सहमति मजुइगु नं धयादिल । वयेकलं स्थायी शान्ति व निर्धारित ईलय् संविधान निर्माण यायेत माओवादी नाप सहमतिलय् वयेगु बाहेकया विकल्प मदुगु बिचाः प्वंकादिल ।
सरकार माओवादी प्रति उदार जूगु धयादिसें नेता पोखरेलं सरकार थें माओवादी नं सरकार प्रति उदार जुयाः सहलहलय् वयेमाःगु खँ धयादिल ।
