'माओवादी आन्दोलन गैरसंवैधानिक'
सत्तारुढ दलतय्सं एनेकपा (माओवादी)या आन्दोलन गैरसंवैधानि व बृहत शान्ति सम्झौता नापं लोकतान्त्रिक मूल्य मान्यता विरुद्ध जूगु निष्कर्ष पिकाःगु दु ।
प्रधानमन्त्री माधवकुमार नेपालया अध्यक्षताय् शुक्रवाः च्वंगु सत्तारुढ दलतय् बैठकं राजनीतिक व कानुनी रुपं माओवादी आन्दोलनया प्रतिकार यायेगु निर्णय नं याःगु दु । अथेहे सरकारयात समर्थन याःगु दलतय्सं शान्ति सुरक्षा कायम यानाः जनताया सुरक्षा यायेत सरकारयात निर्देशन ब्यूगु दु ।
सिंहदरवारय् च्वंगु प्रधानमन्त्रीया ज्याकूथी झिगू दल उपस्थित उगु बैठकं माओवादी आन्दोलन हिंसात्मक जुसाः उकीयात नियन्त्रण यानाः शान्ति सुरक्षाया प्रत्याभूतिया निंतिं तत्परताया नापं दृढतापूर्वक पलाः ल्ह्वनेत नं सरकारयात इनाप याःगु दु ।
अथेहे बैठकं माओवादीयात बजेट पारित यायेत सरकारयात ग्वाहालि यायेत व आन्दोलन मयायेत नं इनाप याःगु दु ।
सरकारयात समर्थन यानाच्वंगु झिंनिगूलिं दलयात बैठकय् ब्वंगु खसां नेपाली कांग्रेस, नेकपा (एमाले), मधेसी जनअधिकार फोरम (लोकतान्त्रिक), नेकपा (माले), तराई-मधेश लोकतान्त्रिक पार्टी, सद्भावना पार्टी, नेकपा संयुक्त, राष्ट्रिय प्रजातन्त्र पार्टी, राष्ट्रिय जनशक्ति पार्टी लगायत झिगू दलया जक उपस्थिति दुगु खः ।
