सभामुखपाखें दवाव अस्वीकार
येँ (सन्ध्या टाइम्स)/यदि सदनं बजेट पारित याये फइगु अवस्था मंत धाःसा मेगु लँपुं जूसां बजेट हयेगु व्यवस्था या धकाः सरकारं सभामुख सुभाष नेम्बाङयात दवाव बिउगु खँ सीदुगु दु। सभामुखं धाःसा दलतय् दथुइ सहमति दयेकाः सदनं हे बजेट पारित यायेमाः धकाः सुझाव बियाच्वंगु दु।
सूत्रं धाः कथं वय्कःयात सदनं पारित यायेगु खःसां यदि माओवादी सभासदतय्सं नाराबाजी यानाच्वंसां ध्वनी मतया लिधंसाय् बजेट पारित या धकाः सरकारं सुझाव बिउगु खः। तर सभामुखं अथे यायेबलय् सदन दुने हे रक्तपात जुइगु अवस्था ब्वलनी, उकिं अज्याःगु स्थिति मवयेकेगु लागिं दलतय्सं पहल यायेमाल धयादीगु खः। वय्कलं दलतय्सं याये मफुगु ज्या सभामुखं या धकाः दवाव मबीत नं आग्रह यानादीगु खः ।
छुं जुयाः सदनं पारित हे याये मफइगु जुल धाःसा सदन बन्द यानाः राष्ट्रपतिपाखें छगू अध्यादेश जारी याकुसें बजेट सार्वजनिक यायेगु सुझाव नं सरकारं खः। तर सभामुखं थ्व नं बांलाःगु उपाय मखु धकाः बिचाः प्वंकादीगु खँ सूत्रं धाःगु दु। सभामुख नेम्बाङं थः अथे यायेत तयार मदु तर नं प्रधानमन्त्रीपाखें सदन दिकि धकाः पौ च्वयाहल धाःसा थः सदन दिकेत बाध्य जुइ तर थ्व नं समाधानया उपाय धाःसा मखु धकाः कनादीगु खँ सूत्रं धाःगु दु । सरकारं बिउगु थज्याःगु विकल्पत सभामुखं माने मयाःगु कारणं हे म्हिगः एमाले संसदीय दलया बैठकं सदनं हे बजेट पारित यायेमाः धकाः निर्णय याःगु खः ।
