आन्दोलन ताःलाकेत माओवादी प्रशिक्षण
येँ (सन्ध्या टाइम्स)/सरकार व माओवादी दथुइ राजनीतिक सहमति कायम जुइ मफयेवं माओवादीं थ्वहे वइगु आइतवाः निसें न्ह्याकेत्यंगु आन्दोलनयात कयाः माओवादी अध्यक्ष प्रचण्डं थौं प्रशिक्षण बियाच्वंगु दु ।
पार्टीया मू ज्याकू पेरिस डाँडाय् न्ह्यानाच्वंगु उगु प्रशिक्षण ज्याझ्वलय् माओवादीया नेवाः राज्य समिति, तामाङ राज्य समितिया लिसें थीथी भातृ संगठनया केन्द्रीय दुजःतय्सं ब्वति कयाच्वंगु दु ।
उगु प्रशिक्षणया झ्वलय् आन्दोलनयात प्रभावकारी यायेत नेवाः राज्य समिति व ताम्सालिङ राज्य समितिं विशेष भूमिका म्हितेमाःगु खँय् बः बिउगु जानकारी माओवादी स्रोतं बिउगु दु ।
अथे हे प्रशिक्षणया झ्वलय् आन्दोलनयात प्रभावकारी दयेकेत रणनीति दयेकेगु बारे नं सहलह जुयाच्वंगु खँ धाःगु दु ।
माओवादीं थ्वहे वइगु कार्तिक १५ गतेनिसें स्थानीय निकायया ज्याकूनिसें कयाः सिंहदरवार तक घेरे यायेगु व स्वनिगलय् नाकाबन्दी यायेगु तकया ज्याझ्वः घोषणा यायेधुंकूगु दु ।
