व्यापारी स्याःगुलिं वीरगाज बन्द
वीरगाजया ब्यापारी राजेश क्यालयात म्हिगः अखिल तराई मुक्ति मोर्चां स्याना बिउगु विरोधय् थौं अनया व्यापारीतय्सं नगर बन्द यात । शान्ति सुरक्षाया माग यासें उमिसं प्रदर्शन यायेगु नापं यातायात व बजाः ठप्प याःगु दु । बजाः बन्द याकेगु झ्वलय् प्रहरी चौकी न्ह्यःने थ्यनेवं प्रहरीं निगः टियर ग्याँस कयेकाः जुलुस तितरबितर याना बिउगु खः । आक्रोशित व्यापारीतय्सं जेसिस सप्ताहया निंतिं घण्टाघरय् राष्ट्रपतियात लसकुस यायेत दयेकातःगु ध्वाखा च्याका बिउगु दु । लिसें तुल व्यानर नं च्याका बिउगु दु । बन्दं यानाः अनया जनजीवन प्रभावित जुयाच्वंगु दु ।
