अमेरिकाय् भिंतुना सांस्कृतिक ज्याझ्वः
येँ (सन्ध्या टाइम्स)/थ्वहे वंगु अक्टोबर २३ कुन्हु नेपाल संवत् न्हूदँया लसताय् अमेरिकाकाया न्युयोर्कय् च्वंगु नेवाःतय् संस्था नेवाः गुथिं अनया ढाका क्लब क्वीन्सय् स्वक्वःगु भिंतुना सनिल ज्याझ्वः यात ।
गुथिया नायः आदित्य महर्जनया सभापतित्वय् जूगु उगु ज्याझ्वलय् संयुक्त राष्ट्र संघया निंतिं नेपाःया स्थायी प्रतिनिधि मधुरमण आचार्य मूपाहां कथं ब्वति कयादीगु खः।
गुथिया सचिव धमेन्द्र गोपाली लसकुस याःगु न्ह्याःगु ज्याझ्वलय् ब्वति काःपिंत ख्येँ सगं बिउगु खःसा मूपाहां आचार्ययात गुथिया नायः महर्जन व न्वकु न्हुच्छेनारायण डंगोलं ह्याउँ सिन्हः तिकाः क्वखा क्वखायेकूगु खः।
उगु ज्याझ्वलय् न्ववासें स्थायी प्रतिनिधि आचार्यं राष्ट्रिय नेपाल संवत्यात सरकारी निकाय प्रचलनय् हयेमाःगु खँ कनादिसें अमेरिकाय् च्वनाः नं नेवाःतय् कला संस्कृति ल्यंकेगु निंतिं नेवाः गुथि अमेरिकां यानाच्वंगु ज्यायात च्वछायादिल ।
अथे हे ज्याझ्वलय् नेपाल अमेरिकन फ्रेनसीप सोसाइइटीया पुलांम्ह अध्यक्ष डा. तारा निरौलां गुथिंया ज्यां अमेरिकाय् नेपाःमितय्त म्हसिकेत भूमिका म्हितूगु खँ कनादिल।
औपचारिक ज्याझ्वः लिपा नेवाः परम्परा कथं रथ यात्रा यायेगु, भैरव कालीया प्याखं क्यनेगुया लिसें नेपालभाषा व खस भाषाया म्येँ नं न्ह्यब्वःगु खः।
