प्रचण्ड ज्या याइम्ह खसां खँ धाःसा उल्टा याइ : देउवा
नेपाली कांग्रेसया वरिष्ठ नेता शेरबहादुर देउवां माओवादी अध्यक्ष पुष्पकमल दाहाल 'प्रचण्डं' ज्या बांलाक याइगु जुसां खँ धाःसा उल्टा न्ववानादीगु खँ धयादीगु दु । वयेकलं माओवादी अध्यक्षं धाइगु छगू तर ज्या मेगू हे याइगु धयादिल । वयेकलं माओवादीया थंज्याःगु असहिष्णु चरित्रं वयात हे हानी जुइगु खँ नं धयादिल ।
प्रेस युनियनं शुक्रवाः पोखराय् याःगु पत्रकार सम्मेलनय् न्ववानादिसें देउवां माओवादीं आन्दोलनया नांमय् बबण्डर ब्वलंकेत स्वःगु द्वपं बियादिल । वयेकलं माओवादी आन्दोलनं देशया द्वन्द्व पाखे यंकाच्वंगु दाबी धयादिल ।
पुलांम्ह प्रधानमन्त्री नं जुयादिम्ह देउवां फुसाः अविश्वासया प्रस्ताव हयाः वर्तमान सरकारयात क्वथलेत माओवादीयात हाथ्या बियादिल । वयेकलं बजेट पारित यायेमब्यूसाः माओवादीया लडाकूतय्त हे तलब मदइगु धयादिसें बजेट पारित यायेत ग्वाहालि यायेत इनाप यानादिल ।
वयेकलं नीनिगू दलया समर्थन प्राप्त जूगु राष्ट्रपतिया पला विरुद्ध वनेमफइगु धयादिसें नीनिगू दलया प्रस्तव कथं हे तत्कालीन सरकारं प्रधानसेनापति यात बर्खास्त यायेगु निर्णय राष्ट्रपतिं हिकूगु दाबी यानादिल ।
