माओवादीया सत्ता कब्जा यायेगु बिचाः : रक्षामन्त्री
रक्षामन्त्री विद्या भण्डारीं एनेकपा (माओवादीं) संविधान निर्माण यायेगु ज्या त्वःता सत्ता कब्जा यायेत स्वयाच्वंगु द्वपं बियादीगु दु । वयेकलं आन्दोलनया नांमय् माओवादीं सत्ता प्राप्त यायेगु व वयां लिपा गबलें सरकारं राजिनामा मयायेगु बिचाः दयेकाच्वंगु द्वपं बियादीगु दु ।
वयेकलं माओवादीं ल्वाभया बलय् आः नं राजनीतिक दलतय्त नियन्त्रणय् कायेत स्वयाच्वंगु व राज्य कब्जा यायेगु बिचाः मत्वतुगु धयादिल । नापं वयेकलं माओवदीं लोकतन्त्रया नामंय् सर्वसत्तावाद लादे यायेत स्वयाच्वंगु द्वपं बियादिल ।
शुक्रवाः भरतपुरय् मदन भण्डारी फाउण्डेशनया चितवन शाखाया उल्लेज्या यानादिसें वयेकलं माओवादीं मन्त्रीतय्त हाकूगु ध्वाँय् क्यना: आन्दोलनया पलेसाः वितण्डा ब्वलंकाच्वंगु धयादिल । वयेकलं मन्त्री पद मदुगुया पीडा माओवादीं सतकय् वया प्वंकाच्वंगु धयादिल ।
वयेकलं नागरिक सर्वोच्चता संसदय् निहित जूगु खँ न्ह्यथंनादिसें बहुमत खाकाः सरकार निर्माण यायेगु पलेसाः माओवादीत सतकय् कुहांवयाः मन्त्रीतय्त दायेगु ज्याय् लगेजुयाच्वंगु द्वपं बियादिल । वयेकलं थ्व उग्रता व अराजकतायाया ज्वलन्त दसी जूगु धयादिल ।
