बेलायतया निंतिं चालिसे व इजिप्टया निंतिं तबदार राजदूत नियुक्त
सरकारं बेलायतया राजदुतय् सुरेशचन्द्र चालिसे व इजिप्टया राजदूतय् श्यामलाल तबदारयात नियुक्त यायेगु निर्णय याःगु दु । अथेहे विहीवाः च्वंगु मनित्रपरिषद्या बैठकं हङकङया महावाणिज्यदुतय् विनोकुमार उपाध्याययात नियुक्त यायेगु निर्णय याःगु दु ।
मन्त्रिपरिषदया बैठकं प्रधानमन्त्रीया अध्यक्षताय् जलवायु परिवर्तन सम्बन्धी परिषद् गठन याःगु दु । उगु परिषदय् गुम्ह दुजः दुथ्याइगु व्यवस्था याःगु दु । अथेहे राष्ट्रिय पर्व ल्ययेगु सम्बन्धय् राजनीतिक समितिलय् सहलह यानाः क्वछीगु निर्णय याःगु दु ।
सरकारं राजनीतिक प्रकृतिया मुद्दा लित कायेगु निर्णय नं याःगु दु । उगु निर्णय कथं सप्तरीया धर्मदेव यादव नापं न्ह्यम्ह, ताप्लेजुङया डम्बरबहादुर लिम्बु नापं नीम्ह व संविधानसभाया चुनावय् सुर्खेतय् जूगु हत्याकाण्डया मुद्दा लितकाःगु दु । नापं राजनीतिक प्रकृतिया मेगू मुद्दा लित कायेगु सम्बन्धी गृहमन्त्री भीम रावलया संयोजक्वतय् छगू समिति गठन याःगु दु ।
सरकारं यलया इमाडोलया घटनाय् मदुम्ह प्रदीप खड्कायात शहीदया सम्मान बीगू निर्णय याःगु दु । अथेहे मन्त्रिपरिषदया बैठकं कृषि सामाग्री लिमिटेडया प्रवन्धक पशुपति गौतमया पदावधि तनेगु व भूमिगत जल विकास समितिया प्रमुख कार्यकारीलय् प्रमोदराज शर्मायात प्यदँया निंतिं नियुक्त याःगु दु । नापं दुग्ध विकास संस्थानया अध्यक्षय् झापाया भारतेन्द्र कुमार मल्लिकयात नियुक्त याःगु दु ।
मन्त्रिपरिषद्या बैठकं संचार मन्त्रालय अन्तर्गृतया राष्ट्रिय प्रशारण नियमावली २०६६यात स्वीकृत याःगु दु । अथेहे प्रधानमन्त्रीया प्रत्यक्ष निर्देशनय् विकास निर्माण आयोजनाया निरीक्षण यायेगु निंतिं अनुगमन समिति गठन यायेगु निर्णय याःगु दु ।
