श्रीलंकाया राष्ट्रपति राजपाक्षे येँय्
श्रीलंकाया राष्ट्रपति महिन्दा राजपाक्षे धार्मिक भ्रमणया निंतिं बिहीवाः येँ थ्यंकादीगु दु । राष्ट्रपति राजपाक्षे, वयेकया जहान, स्वम्ह मन्त्रीत सहित न्ह्यम्ह दुजः दुगु पुच: सहित येँ झायादीगु खः ।
श्रीलंकाया विषेश जाहाज पाखे येँ थ्यंकादिम्ह राजपाक्षेया पुचःयात त्रिभुवन अन्तराष्ट्रिय विमानस्थलय् परराष्ट्रमन्त्री सुजाता कोइराला व संस्कृति मन्त्री मिनेन्द्र रिजालं लसकुस यानादीगु खः ।
राजपाक्षें मुख्य रुपं बुद्ध बूगु थाय् लुम्किनीया दर्शन यायेगु उदेश्यं नेपाः झायादीगु खः । वयेकलं लुम्बिनीलय् बौद्ध धर्मया विधी विधान कथं पुजा अर्चना यानादीगु ज्याझ्वः दु ।
निन्हुन्यंकया नेपाः भ्रमणया झ्वलय् वयेकलं लुम्बिनी वनेगु नापं नेपाःया राष्ट्रपति डा. रामवरण यादव, प्रधानमन्त्री माधवकुमार नेपाल लगायत सरकारी उच्च अधिकारीत नाप खँल्हाबंला यानादीगु ज्याझ्वः दु । अथेहे वयेक लिहांझाये न्ह्यः शनिवाः छगू पत्रकार सम्मेलन याइगु ज्याझ्वः नं क्वछीनातःगु दु ।
थ्वस्वयां न्ह्यः श्रीलंकाया राष्ट्रपति राजपाक्षें वंगु मार्चय् नेपाःया भ्रमण यानादीगु खः । उगु ईलय् पाकिस्तानय् श्रीलंकाया क्रिकेट कासामितय्त गोली क्येकूगुलिं वयेक आकस्मिक रुपं थःगु भ्रमण चीहाकेका श्रीलंका लिहांझायादीगु खः ।
राजपाक्षेया भ्रमणया ईलय् सुरक्षा व्यवस्था क्वतुकेत सरकारं दक्वं तयारी पूवंकेधुंकूगु खँ धा:गु दु ।
