स्काई डाइभिंगय् नेपाः दुने विश्व कीर्तिमान
येँ (सन्ध्या टाइम्स)/नेपाःया सगरमाथा लागाय् निम्ह स्काई डाइभरतय्सं २१ हजार फिट च्वं तिन्हुयाः स्काई डाइभरया ख्यलय् न्हूगु विश्व कीर्तिमान कायम याःगु दु। न्युजिल्याण्डया नागरिक मय्जु विन्डी स्मीथ व अमेरिकी नागरिक भाजु टम नुनानं म्हिगः सुथय् ७:३० बजे उगु डाइभिङ्ग यासें थ्व कीर्तिमान तःगु खः ।
सगरमाथाया गोरखसेप कालापत्थर प्लेटु लागाय् वय्कःपिंसं उगु डाइभिङ्ग याःगु खः। २१ हजार फिटं कुहां वयाः वय्कःपिं वहे लागाया १७,१९२ फिटया उचाईलय् कुहां वःगु खः। थुलि उचाईलय् कुहां वयेगु नं स्काई भाइभिङ्गया थःगु हे कीर्तिमान खः धाःगु दु। यदि थुकी गनं गल्ती जुल धाःसा डाइभरत च्वापुया पुखुली (ग्लेशियर) लाः वनीगु खतरा दु।
म्हिगः हे भारतया डाइभर भाजु जय किशनं नं थज्याःगु हे डाइभिङ्ग याःगु खः ।
वय्कःपिंसं एएस ३५० बी-३ नम्बरया युरोकप्टर हेलिकप्टरपाखें तिन्हुयाः थ्व डाइभिङ्ग याःगु खः। छक्वः सगरमाथाया च्वकाय् ल्याण्ड यात धकाः विवादय् वःगु युरोकप्टरया हेलिकप्टर हे जक थुलि उचाईलय् ब्वयेफु। नेपालय् फिस टेल एअरयाके जक थज्याःगु हेलिकप्टर दु।
थ्व डाइभिङ्गया ज्या एभरेष्ट स्काई डाइभिङ्ग धइगु नां तयाः जूगु खः। थज्याःगु साहसिक कासाया लागिं नेपालय् आपालं बांलाःगु थाय्त दुगु खँ थ्व सम्बन्धी विज्ञतय्सं धाःगु दु।
छुं ई न्ह्यः मेगु छगू पुचलं २० हजार फिटं तिंन्हुयाः थज्याःगु हे छगू विश्व कीर्तिमान तःगु खः ।
