राजपाक्षे वयेवं येँया सुरक्षा कडा
येँ (सन्ध्या टाइम्स)/श्रीलंकाया राष्ट्रपति महेन्द्रा राजपाक्षे थःगु धार्मिक भ्रमणया झ्वलय् थौं नेपाः थ्यंकः वःगु दु।
स्वन्हुयंकंया नेपाः भ्रमणय् झाःम्ह राष्ट्रपति राजपाक्षे कन्हय् लुम्बिनी वनाः अन दर्शन यायेगु लिसें पुजा नं यानादीगु ज्याझ्वः दु ।
अथे हे वय्कलं राष्ट्रपति डा. रामवरण यादव, प्रधानमन्त्री माधव नेपाल व परराष्ट्र मन्त्री सुजाता कोइरालायात नं नापलानाः नेपालय् न्ह्यानाच्वंगु शान्ति प्रक्रिया बारे जानकारी कयादी ।
वंगु फागुनय् नेपाः झाःम्ह राष्ट्रपति राजपाक्षे पाकिस्तानय् थःगु देय्या क्रिकेट कासामितय्त आक्रमण जुइवं भ्रमण चीहाकः यानाः स्वदेश लिहां वंगु खः ।
उखे श्रीलंकन राष्ट्रपतिया भ्रमणया झ्वलय् येँया सुरक्षा व्यवस्था कडा याःगु दु। थुकिया लागिं जक थौं येँय् थप द्वःछिम्ह प्रहरी परिचालन यानागु खँ उपत्यका प्रहरी प्रभागया प्रहरी प्रमुख नवराज सिलवालं कनादीगु दु। अथे हे राजपाक्षे वये-वने जुइगु लँपुइ सवारी साधन चले मयायेत नं प्रहरीं इनाप याःगु दु ।
