संवैधानिक समितिया बैठक च्वने मफुत
येँ (सन्ध्या टाइम्स)/न्हूगु नेपाः दयेकेगु निंतिं निर्वाचित जुयाः वयाच्वंपिं संविधानसभाया सभासद्पिं संविधान दयेकेगु निंतिं च्वनीगु महत्वपूर्ण बैठकय् अनुपस्थित जुइवं संविधानसभाया बैठक स्थगित जुइगु जुयाच्वंगु दु।
संविधानसभाया दकलय् महत्वपूर्ण समिति संवैधानिक समितिया थौं च्वनेमाःगु बैठकय् गणपुरक ल्याः मखायेवं स्थगित जूगु दु। मुक्कं ६३ म्ह सभासद् दुगु उगु समितिया थौं च्वने धाःगु बैठकय् १५ म्ह जक उपस्थित जुइवं बैठक स्थगित यायेमाःगु खः। बैठकय् कन्हय् च्वनेगु कथं स्थगित याःगु खः ।
समितिया बैठक ८ बजे दुने च्वनेमाःगु प्रावधान दुगु खःसा ८:३० तक नं गणपुरक ल्याः मगायेवं समितिया सभापति निलाम्बर आचार्यं बैठक स्थगित यानादीगु खः।
बैठक स्थगित यायेगु झ्वलय् वय्कलं कन्हय् इलय् हे बैठकय् उपस्थित जुइत सकलें सभासद्पिंत निर्देशन नं बियादीगु दु ।
थौं च्वनेत्यंगु बैठकय् उपसमितिं लःल्हाःगु मस्यौदा अन्तर्गत न्हूगु संविधान सक्रमणकालीन व्यवस्था विषयलय् सहलह जुइगु कार्यसूची दयेकातःगु खः ।
न्हूगु संविधान दयेकेगु निंतिं इलय् थीथी समितिं थःपिनि सुझाव बी मफयेवं छुं ई तक संविधानसभाया बैठक हे स्थगित याःगु खःसा संविधान समितिं सुझाव बीगु कार्यतालिका नं खुक्वः तक संशोधन यायेधुंकूगु दु।
तत्कालिन संवैधानिक समितिया सभापति माधव नेपालं राजीनामा बीवं लछि तक छुं हे ज्या मजूगु समितिइ निलाम्बर आचार्य न्हूम्ह सभापति जुइवं संविधान च्वयेगु ज्या न्ह्याइगु अपेक्षा जुयाच्वंगु खःसा समितिया बैठक तकं नियमित रुपं च्वने मफेवं इलय् संविधान च्वयेगु क्वचाइगु खँय् विज्ञतय्सं आशंका प्वंकूगु दु ।
