हत्या विरुद्ध न्यागू जिल्ला बन्द
येँ (सन्ध्या टाइम्स)/ माओवादीया कार्यकर्ताया हत्याय् संलग्न जूपिंत कारवाही यायेमाःगु माग यासें एकीकृत नेकपा माओवादीं थौं लिम्बुवान राज्य समितिं मेची व कोशीया न्यागू जिल्ला अनिश्चितकालया निंतिं बन्द याना बिउगु दु ।
ताप्लेजुङ्गया माओवादी कार्यकर्ता लगन लिवाङ्ग लिम्बुया हत्याय् संलग्न जूपिंत प्रहरी प्रशासनं कारवाही मयाःगु धासें माओवादीं मेचीया इलाम, पाँचथर, ताप्लेजुङ्ग, कोशीया तेर्हथुम व धनकुटा जिल्ला थनिंनिसें अनिश्तिकालाया निंतिं बन्द याःगु खः ।
बन्दं मेची कोशीया न्यागू जिल्लाया उद्योग कलकारखाना, शिक्षण संस्था, बजाः, यातायात ठप्प जुयाच्वंगु दु। बन्दया कारणं यानाः अनया लँय् चले जुइगु फुक्कं सवारी साधन ठप्प जुयाच्वंगु दुसा उगु लँपु जुयाः देया थीथी भागय् वनीगु यातायात नं ठप्प जुयाच्वंगु दु। गुकिं यानाः आपालं यात्रुत लँय् तुं अलपत्रय् लानाच्वंगु दु ।
वंगु निला न्ह्यः वाईसीएलया कार्यकर्ता लिवाङगयात ताप्लेजुङ्गया फुङलिङ्ग गाविस हत्या याःगु खः।
उखे भोजपुर सदरमुकामय् माओवादी व एमालेया कार्यकर्ताया दथुइ तनाव अप्वयेवं म्हिगः बहनी ६ बजे निसें स्थानीय प्रशासनं तयातःगु कर्फ्यु थौं नं जारी जुयाच्वंगु दु।
कर्फ्युया कारण अनया जनजीवन प्रभावित जुयाच्वंगु दु। अनया छगू क्याम्पसया शिक्षकयात माओवादी कार्यकर्तातय्सं दाया बीवं एमाले व माओवादीया दथुइ ल्वापू तच्वःगु खः ।
