कारोबार लिसें नेप्से क्वय्
येँ (सन्ध्या टाइम्स)/नेपाल स्टक एक्सचेन्जय् जुयाच्वंगु शेयर कारोबारं नेप्से परिसुचक कुहां वयेगु क्रमं निरन्तरता कायेगु दिउगु मदुनि। स्वन्ति नखः धुंका बजाः चाःगु इलंनिसें कुहां वयाच्वंगु नेप्से कुहां वयेगु क्रमं म्हिगः नं निरन्तरता काःगु दु। म्हिगःया कारोबारय् नं बजाः चालेवं थ्यंमथ्यं बाघौ तक थातं लानाच्वंगु नेप्से परिसुचक वयां लिपा मदिक कुहां वःगु खः। बजाः बन्द जुइ स्वयां न्ह्यः तक ५८४ अंक तक थ्यनेधुंकूगु परिसुचक लिपांगु झिगू मिनेटय् छुं भचा थहां वंगु खः। म्हिगः नं नेप्से कुहां वनेगुली वाणिज्य समुहया कारोबारय् वःगु र्हास हे मू कारण जुल ।
स्टक एक्सचेन्जय् म्हिगःया कारोबारय् नेप्से परिसुचक ५ दशमलव ४ अंकं कुहां वयाः ५८५ दशमलव शुन्य ४ अंकय् थ्यंगु दु। अथे हे सेन्सेटिभ १ दशमलव ४१ अंकं कुहां वःगु दुसा फ्लोट शुन्य दशमलव ३९ अंकं कुहां वःगु दु ।
स्टक एक्सचेन्जया कथं म्हिगः नं वाणिज्य बैंक समुहया मू मू बैंकत मध्ये स्टायण्डर्ड चार्टर्डया दकलय् अप्वः ५१/-, हिमालयन बैंकया ५०/-, सिटिजन्स बैंक इन्टरनेशनलया ४८/-, एभरेष्ट बैंकया ३६/- तका दां कुहां वयेवं नेप्से नं कुहां वःगु खः। वाणिज्य समुहया मू मू बैंकया शेयर भाः कुहां वयेवं थुगु समुहया उपसुचक दकलय् अप्वः ७ दशमलव ६ अंकं कुहां वयाः ५६३ दशमलव ६३ अंकय् थ्यंगु दु। वाणिज्य समुह धुंकाः फाइनान्स समुहपाखें नं अप्वः थें कमपनीया शेयर भाः कुहां वयेवं थुगु समुह २ दशमलव शुन्य ९ अंकं कुहां वयाः ६१७ दशमलव ३१ अंकय् थ्यन। अथे हे वीमा समुह १ दशमलव ३१ अंकं कुहां वयेवं ६०६ दशमलव शुन्य ७ अंकय् थ्यंगु दुसा विकास बैंक समुह शुन्य दशमलव ४७ अंकं कुहां वनाः ६४७ दशमलव ८ अंकय् थ्यंगु दु ।
मेखे दक्वं समुहया कारोबार कुहां वंसा म्हिगः हाइड्रो पावर समुह उपसुचक छगू जक ६ दशमलव शुन्य २ अंकं थहां वनाः ८३२ दशमलव ४७ अंकय् थ्यंगु दु ।
छखे स्टक एक्सचेन्जय् जुयाच्वंगु शेयर कारोबारं नेप्से परिसुचक मदिक कुहां वयाच्वंगु दुसा मेखे छन्हु न्ह्यःया तुलनाय् शेयर संख्याया कारोबारय् नं कुहां वःगु दु। छन्हु न्ह्यः ग्वीस्वद्वः न्यासः व झिंछगू कित्ता शेयर न्याये-मी जुयाः न्यागू करोड स्वीनिगू लाख गुद्वः तका दांया कारोबार जूगु खः। म्हिगः धाःसा शेयर संख्याया कारोबार कुहां वयाः न्यय्प्यद्वः न्हय्सः व नीन्हय्गु कित्ता शेयर न्याये-मी जुयाः स्वंगू करोड स्वंगू लाख चय्न्याद्वः तका दांया कारोबार जुल।
दांया ल्याखं किस्ट बैंकं दकलय् अप्वः स्वीगुंगू लाख झिंन्याद्वः तका दांया कारोबार याःगु दु। मेखे म्हिगः नं मर्चेण्ट फाइनान्स लिमिटेडं दकलय् अप्वः कमे यायेत ताःलाःगु दुसा सिटिजन्स बैंक इन्टेरनेशलं दकलय् अप्वः द्यापं फःगु दु ।
