शान्ति सम्झौता विपरीत न्वमवायेत एमालेया निर्देशन
प्रमुख सत्तारुढ दल नेकपा (एमाले)या संसदीय दलं बृहत शान्ति सम्झौता विपरित न्वमवायेत एमाले सभासद्तय्त निर्देशन ब्यूगु दु । नापं सुनां नं सम्झौता विपरीत न्ववासाः व पार्टीया आधिकारिक धारण मजुइगु खँ धाःगु दु ।
लिप्पां ईलय् रक्षामन्त्री विद्या भण्डारी व वरिष्ठ नेता केपी शर्मा ओलीं शान्ति सम्झौता पुनरावलोकन यायेमाःगु बिचाः प्वंकादीगु खः । बैठक लिपा एमाले प्रमुख सचेतक भीम आचार्यं दलतय्सं शान्ति सम्झौताया कार्यान्वयनय् बः बियाच्वंगु ईलय् सुनां नं उकीया विरुद्ध न्ववाइसाः उगु धापू व्यक्तिगत जुइगु धयादिल ।
अथेहे बैठकं बजेट संसदं हे पारित यायेत सरकारयात इनाप याःगु दु । प्रधानमन्त्री लगायत एमालेया प्रमुख नेतातय् ब्वति दुगु उगु बैठकय् अधिकाशं सभासद्तय्सं बजेट संसदं हे पारित यायेमाःगु सुझाव ब्यूसें मेगू विकल्प मालेमज्यूगु बिचाः प्वंकूगु खः ।
सभासद्तयसं निर्धारित ईलय् हे संविधान निर्माण यायेत आवश्यक राजनीतिक सहमितया पहल यायेमा:गु खँय् बः ब्यूगु दु । अथेहे सभासद्तय्सं पार्टी नेतृत्वयात पार्टी दुने सहमति कायम यानाः छप्पं जुइत नं इनाप याःगु दु ।
बैठकय् न्ववानादिसें प्रधानमन्त्री माधवकुमार नेपालं सरकारया ध्यान शान्ति प्रकृया यात निष्कर्षय् थ्यंकेगु व न्हूगु संविधान ईलय् हे निर्माण यायेगु ज्याय् अप्व केन्द्रीत जूगु धयादिल । वयेकलं राजनीतिक निकासया निंतिं माओवादी लगायत राजनीतिक दलतनाप परामर्श जुयाच्वंगु व सहमतिया निंतिं सरकारं अधिक्तम लचकता क्यनीगु धयादिल ।
