नेवाः प्रदेशया लागिं नेवाः मंकाः संघर्ष

नेवाः स्वायत्त लागा प्राप्त यायेगु ताः तयाः नेवाःतय्सं मंकाः आन्दोलन न्ह्याकेगु घोषणा याःगु दु । नेवाःतय् स्वायत्तता सहितया स्वशासन दयेमाः धइगु बिचाः तईपं खलः पुचःत जानाः थुकिया निंतिं छगू मंकाः संघर्ष समिति नं स्वंगु दु । थ्वहे संघर्ष समितिपाखें थ्व मंकाः आन्दोलन न्ह्याकेगु तयारी जूगु खः । म्हिगः थुकिया अवधारणा घोषणा जुइधुंकाः आः छसीकथं सतक ज्याझ्वः नं पिहां वइ जुइ ।

नेवाः स्वशासन कायेगु लािगं थज्याःगु मंकाः संघर्ष न्ह्याकेगु ग्वसाः ग्वयाः नेवाः देय् दबुलिं वास्तवय् बांलाःगु ज्या याःगु दु । खतुं थ्व संघर्षया ज्याझ्वः ताः ई न्ह्यः हे न्ह्याके माःगु खः । नेवाः स्वशासन कायेगु खःसा राज्य व राजनीतिक पार्टीतय्त दवाव बीमाः धकाः छुं ई न्ह्यः नं थीथी नेवाः पुचःत च्वनाः नेवाः गणतान्त्रिक मोर्चा स्वनाः ज्या न्ह्याकूगु खः । तर थीथी कारणं यानाः उगु मोर्चां बांलाक न्ह्याये मफुत । आः वहे प्रकृतिया मेगु समिति स्वनाः संघर्ष न्ह्याकेगु कुतः जूगु दु । न्हापा जूगु कमी कमजोरीतपाखें शिक्षा कयाः न्ह्याः वंसां नेवाः आन्दोलन असफल जुइमाःगु छुं हे कारण मदु ।

थःथःपिनि जातीय प्रदेशया माग यानाः मेमेगु जनजातितय्सं ताः ईं न्ह्यः हे संघर्ष न्ह्याकेधुंकूगु दु । लिम्बूवानय् ला बिस्कं राज्यया हे आभास बीधुंकूगु दुसा ताम्सालिङय् आः अभियान शुरु जुयाच्वंगु दु । मधेश प्रदेशया खँ आः संसदय् हे क्वाःगु विषय जुयाच्वंगु दु । फुकसित बिस्कं प्रदेश बियाः नं राजधानी धइगु त्वहचिनाः नेवाःतय्त बिस्कं प्रदेश मबीफुगु खतरायात ध्यानय् तयेगु खःसा आः अनिवार्य आन्दोलन यायेमाःपिं धईपं नेवाःत हे खः ।

More Stories Like this