राष्ट्रिय सहमित यायेमफुसाः राजीनामा ब्यू : यादव
मधेशी जनअधिकार फोरमया अध्यक्ष उपेन्द्र यादवं प्रधानमन्त्रीं राजनीतिक गतिरोध ज्यंकेत राष्ट्रिय सहमति यायेमफुसाः राजीनामा बियाः निकासया लँपू चायेके माःगु खँ धयादीगु दु ।
बिहीवाः पार्टीपाखें भैरहवाय् ग्वसाःग्वःगु पत्रकार सम्मेलनय् वयेकलं संविधानसभा यात विफल यानाः भंग यायेगु षड्यन्त्र जुयाच्वंगु द्वपं बियादीगु दु । वयेकलं सरकारय् दुथ्याःगु दलतय्सं अवरुद्ध संसद सुचारु यायेगु पाखे च्यूताः मप्वंकूगु धयादिसें थुकीं संविधान सभायात विफल दयेकाः थुकीयात भंग यायेगु षड्यन्त्रया आभाष जुयाच्वंगु धयादिल ।
निर्वाचनय् जनतां विश्वास मयापिं मनूत दुथ्याःगु वर्तमान सरकारया कारणं हनिमय्न्यंक नेपाःया नां बदनाम जूगु धयादिल । वयेकलं सत्ताया कासाःय् थःगु दल लगे मजुइगु धयादिसें न्हापा मधेशवादी दलतनाप जूगु सहमति कार्यान्वयन यायेत सरकारं च्यूता मप्वंकूसाः स्वक्वःगु जनआन्दोलन यायेगु ख्याच्वः बियादिल ।
