क्षेत्रीय रंगशाला इटहरीलय् निर्माण यायेमाःगु धासें आमहड्ताल
पूर्वाञ्चल क्षेत्रीय रंगशाला इटहरीलय् निर्माण जुइमाःगु माग यासें बुधवाः निसें अनिश्चितकालीन आमहड्तालय् कुहांविपं स्थानीयवासीतय्सं निगू दर्जन सवारी साधनय् तोडफोड याःगु दु । बन्दकर्तातय्सं मे. १. ख. १२८८ नम्बरया यात्रुवहाक बसय् मि च्याका: ब्यूगु दुसाः मेगू बस, ट्रक, ट्याक्टर लगायत सवारी साधनय् अप्पां क्येका तोडफोडा याःगु खः ।
बन्दकर्तातय्सं सुथं निसें कट्ठी व अप्पा ज्वना लँ अवरोध याःगु खसाः लिपा: प्रहरीं अवरोध चीकेत स्वःगु ईलय् थीथी थासय् प्रहरी नाप ल्वापू जूगु ख: । बन्दकर्ता व प्रहरी दथुइ इटहरीया पश्चिम चोक व चौरस्त चोकय् ल्वापू जूगु खः । ल्वापू लानाः च्याम्ह बन्दकर्तात घाःपाः जूगु दु । घाःपाः जूपिनि स्थानीय क्लिनिकय् वासः जुयाच्वंगु दु ।
आमहडतालया कारणं इटहरीया बजाः, पसः, शैक्षिक संस्था, व्यापार व्यवसाय दक्वं ठप्प जूगु दु । ओन्दोलनकारीतय्सं क्षेत्रीय रंगशालाया निर्णय मजुतल्ले आमहड्ताल लित मकायेगु ख्याच्वः ब्यूगु दु ।
