माओवादी आन्दोलनया सामना यायेत सरकार तयार : संचार मन्त्री
सूचना व संचारमन्त्री शंकर पोखरेलं प्रतिपक्षी दल एनेकपा (माओवादीं) याइगु आन्दोलन सामना यायेत सरकार तयार जूगु खँ धयादीगु दु । वयेकलं प्रजातन्त्रतय् विरोध यायेगु स्वभाविक प्रकृया जूगुलिं माओवादीयात आन्दोलन पाखें आःया निकास पिहांवइगु लगेजुसां सरकार उकीया न्ह्यने क्वमछुइगु धयादिल ।
बुधवाः मुसीकोट खलंगाय् प्रेस चौतारीं याःगु पत्रकार नापलायेगु ज्याझ्वलय् वयेकलं माओवादीं बजेट पास याये मब्यूसाः सरकारं वैकल्पिक लँपू पाखे बजेट पास याकेत बाध्य जुइगु धयादिल । वयेकलं सरकार बिना बजेट न्ह्यने मवनीगु धयादिसें बहुमत वा अध्यादेश लागु यानाः जुसां बजेट पास याइगु धयादिल ।
सरकारं श्रमजीवि ऐन लागु यायेधुंकूगु व कार्यान्वन मयाःगु संचार माध्ययात अनुगमन यानाः लोक कल्याणकारी विज्ञपन दिकेगु ख्याच्वः संचार मन्त्री पोखरेलं बियादिल । वयेकलं श्रमजीवि ऐन कार्यान्वन यायेत सरकारयात पत्रकारतय्सं नं ग्वाहालि यायेमा:गु बिचा: प्वंकादिल ।
