थौं शंखधर दिवसया लसताय् थीथी ज्याझ्वः
येँ (सन्ध्या टाइम्स)/राष्ट्रिय विभूति शंखधर साख्वाः दिवसया लसताय् थौं थीथी ज्याझ्वः यानाच्वंगु दु। थ्व लसताय् थौं शंखधर दिवस समारोह समितिपाखें डल्लुइ छगू र्याली पिकात। डल्लु चौतारां पिहां वःगु उगु र्याली विजेश्वरी, धिमेल्वहं, डल्लु आवास, भगवान पाउ आदि लागा चाःहिलाः डल्लु आवास लागाय् छगू सभाय् हिउगु खः ।
शंखधर दिवस समारोह समितिया नायः विजय सैंजुया सभापतित्वय् शंखधरया मूर्तिइ स्वां देछासें न्ह्याःगु उगु ज्याझ्वलय् न्हूदँ समारोह समिति-११३० या नायः व सभासद् तीर्थराम डंगोल, नेपाः राष्ट्रिय पार्टीया नायः डा. केशवमान शाक्य, सभासद् बुद्ध साय्मि, नेवाः देय् दबूया नायः नरेश ताम्राकार, न्हूदँ समारोह समितिया छ्यांज्ये नरेशवीर शाक्य आदिपिं नं पाहां कथं झाःगु खः। र्यालीइ आपालं भाषिक कार्यकर्ता नापं स्कूलया विद्यार्थीतय्सं नं ब्वति काःगु खः।
अथे हे थौं शंखधर दिवसया हे लसताय् नेपाल संवत् ईमेज सिरपाः समितिपाखें नं छगू तुच्चा ज्याझ्वः याइगु जूगु दु। समितिया नायः आर.के. मानन्धरया लाजिम्पाटस्थित छेँय् जुइगु उगु ज्याझ्वलय् भूषणप्रसाद श्रेष्ठया न्हूगु हाइकु मुना सफू विमोचन जुइगु ज्याझ्वः नं दु। थुगुसी नेपाल संवत् ईमेज सिरपाः भाजु काशिनाथ तमोटयात लःल्हाःगु खः।
उखे राष्ट्रपति डा. रामवरण यादवपाखें थ्व लसताय् याइगु ज्याझ्वः धाःसा निश्चित मजूनिगु खँ सीदुगु दु ।
