समस्या ज्यंकेत प्रमं सहलह न्ह्याकल
येँ (सन्ध्या टाइम्स)/राजनीतिक गतिरोध अन्त्य यानाः सदन न्ह्याकेगु निंतिं प्रधानमन्त्री माधव नेपालं सहलह न्ह्याकादीगु दु। वय्कलं थौं सुथय् संविधानसभाया सभाध्यक्ष सुवास नेम्वाङ्ग, अर्थमन्त्री सुरेन्द्र पाण्डे, गृहमन्त्री भीम रावल, कांग्रेसया उपसभापति रामचन्द्र पौडेलपिं लिसे अवरुद्ध जुयाच्वंगु सदन न्ह्याकेगु व बजेट पारित यायेगु खँयात कयाः सहलह ब्याकादीगु खः ।
सहलहया झ्वलय् कांग्रेसया वरिष्ठ नेता शेरबहादुर देउवायात चितवनय् माओवादीं याःगु आक्रमणयात कयाः नं खँल्हाबल्हा जूगु खः ।
थौं हे प्रधानमन्त्री माधव नेपालं एमाले, कांग्रेस व प्रमुख प्रतिपक्षी माओवादीलिसे नं सहलह यानादीगु ग्वसाः दयेकातःगु दु ।
प्रधानमन्त्री निवास बालुवाटारय् कांग्रेस व एमाले लिसेया सहलहया झ्वलय् माओवादीया आन्दोलन, माओवादीं बिउगु विकल्प व राष्ट्रपतिया पलाःया बारे एमाले व कांग्रेसं क्यने फइगु लचकताया बारे नं सहलह जुइगु खँ कांग्रेसया प्रमुख सचेतक लक्ष्मण घिमिरें धयादीगु दु ।
