रंगशाला निर्माण यायेत आम हडताल
येँ (सन्ध्या टाइम्स)/क्षेत्रीय रंगशाला इटहरी दयेकेमाःगु माग यासें इटहरीया स्थानीय वासिन्दां थौं इटहरी आम हड्तालाया आह्वान याःगु दु ।
सरकारं इटहरीइ क्षेत्रीय रंगशाला दयेकेगु धकाः योजना दयेके धुंकूसां नं योजना हस्तान्तरण यायेगु ज्याय् कन्जुस यानाच्वंगु धासें उमिसं थौं अन आम हडतालया आह्वान याःगु खः ।
थुकिया बारे प्रधानमन्त्रीयात तकं जानकारी याके धुंकाः नं प्रधानमन्त्रीया आश्वासन कथं ज्या मजुइवं स्थानीय वासिन्दा आन्दोलनय् कुहां वःगु खः ।
स्थानीय वासिन्दां आम हडताल यायेगु झ्वलय् अनया फुक्कं यातायात साधन बन्द याना बिउगु दुसा शिक्षण संस्था, कलकारखाना बजाः नं बन्द याकूगु दु ।
बन्दया कारण उगु लँपु जुयाः देय्या थीथी थासय् वनीगु यातायातया लिसें यात्रुत प्रभावित जुयाच्वंगु दु। स्थानीय वासिन्दां थ्व स्वयां न्ह्यः नं अन आन्दोलनया ज्याझ्वः यायेधुंकूगु दु ।
