नेप्से कुहां वनेगु मदिउनि
येँ (सन्ध्या टाइम्स)/नेपाल स्टक एक्सचेन्जय् ताः ई लिपा कारोबार कम्पनीया ल्याः थहां वंगु दु। कारोबार कम्पनीया ल्याः थहां वंसा नेप्से परिसुचक धाःसा थहां वने फयाच्वंगु मदुनि। थुगु वाःया शुरुंनिसें मदिक कुहां वनाच्वंगु नेप्से परिसुचकं म्हिगः नं कुहां वनेगु क्रमं निरन्तरता काल। नेपाल स्टक एकसचेन्जया कथं नेप्से थहां कुहां जइगुली मू भूमिका दुगु वाणिज्य समुहया कारोबार थहां वये मफुगुलिं नं नेप्से थुकथं मदिक कुहां वनाच्वंगु खः ।
थुगु वाःया न्हापांगु न्हिया कारोबारं हे ६ सय अंकं क्वय् कुहां वःगु नेप्से परिसुचक म्हिगःया शेयर कारोबारय् ४ दशमलव ८९ अंकं कुहां वयाः ५९० दशमलव ४४ अंकय् थ्यंगु दु। सेन्सेटिभ नं १ दशमलव ८५ अंकं कुहां वयाः १४८ दशमलव ४७ अंकय् थ्यंगु दु। फ्लोट शुन्य दशमलव ४९ अंकं कुहां वयेवं ५६ दशमलव ४५ अंकय् थ्यन ।
स्टक एक्सचेन्जय् जूगु शेयर कारोबारय् म्हिगः नं दक्वं धइथें प्रमुख बैंकया शेयर भाः कुहां वःगु दु। म्हिगः दकलय् अप्वः एभरेष्ट बैंकया शेयरय् प्रति कित्ता ११६/- तका दां कुहां वल। अथे हे एनआईसी, इन्भेष्टमेण्ट, माछापुच्छ्रे, ग्लोबल, किस्ट, कुमारी, स्टायण्डर्ड चार्टर्ड, सिदार्थ बैंकया नं भाः कुहां वयेवं म्हिगःया कारोबारय् दकलय् अप्वः वाणिज्य समुह ८ दशमलव शुन्य ३ अंकं कुहां वयाः ५७१ दशमलव २३ अंकय् थ्यंगु दु। विकास बैंक समुह शुन्य दशमलव ६७ अंकं कुहां वयाः ६४७ दशमलव २१ अंकय् थ्यन। फाइनान्स समुह १ दशमलव ६ अंकं कुहां वयाः ६२० दशमलव २१ अंकय् थ्यंगु दु। वीमा समुह नं १ दशमलव ३४ अंकं कुहां वयाः ६०७ दशमलव ३८ अंकय् थ्यन ।
म्हिगःया कारोबारय् थहां वंगु समुह मध्ये जलविद्युत समहुया उपसुचक २ दशमलव ८८ अंकं थहां वनाः ८२६ दशमलव ४५ अंकय् थ्यंगु दु। अथे हे अन्य समुह नं ४ दशमलव ७ अंकं थहां वंगु दु ।
मेखे कारोबार कम्पनीया थहां वं थें शेयरया कारोबार नं थहां वंगु दु। तर शेयर कारोबार थहां वंसां दांया ल्याखय् धाःसा छन्हु न्ह्यःया तुलना कुहां वःगु दु। स्टक एक्सचेन्जय् म्हिगः ग्वीस्वद्वः न्यासः व झिंछगू कित्ता शेयर न्याये-मी जुयाः न्यागू करोड स्वीनिगू लाख गुद्वः तका दांया कारोबार जुल । ख्वीगुंगु कम्पनीया कारोबार जूगुली दांया ल्याखं दकलय् अप्वः किस्ट बैंकं ग्वीखुगू लाख स्वीखुद्वः तका दांया कारोबार याःगु दु। मेखे मर्चेण्ट फाइनान्स कम्पनीं दकलय् अप्वः कमे याःगु दुसा नेपाल एक्सप्रेस फाइनान्स कम्पनी दकलय् अप्वः द्यापं फयेमाःगु दु ।
