माओवादीं शान्ति प्रकृया स्यंकेत स्वयाच्वन : ओली
नेकपा (एमाले)या वरिष्ठ नेता केपी शर्मा ओलीं एकीकृत नेकपा (माओवादीं) घोषणा याःगु आन्दोलनया ज्याझ्वः शान्ति प्रकृयायात स्यंकेगु कथं जूगु द्वपं बियादीगु दु । वयेकलं माओवादीं थुकीयात आन्दोलन धकाः घोषणा यासां थुकीं आन्दोलनया नामय् वितण्डता ब्वलंकेत स्वःगु धयादिल ।
बुधवाः पोखराय् पत्रकारत नाप खँल्हाबंला यानादिसें वयेकलं माओवादीं आन्दोलनया ज्याझ्वः घोषणा यानाः मेगू दल व जनतायात ख्यायेत स्वःगु धयादिल । वयेकलं माओवादीं धाः थें दक्वं खँ मजुइगु धयादिसें माओवादीया ति अधिकार मेगू दल याके नं दुगु दाबी यानादिल । वयेकलं माओवादीया आन्दोलनयात सुनां नं समर्थन मया:गु धयादिसें थुगु आन्दोलन सफल मजुइगु दाबी यानादिल ।
अथेहे पोखरय् हे बुधवाः एमाले पोखरा नगर कमिटीं नेपाल संवत् ११३० न्हूदँया लसताय् याःगु ज्याझ्वलय् न्ववानादिसें वयेकलं बुहमत खाका वर्तमान सरकार हिलेत माओवादीयात हाथ्या बियादिल । वयेकलं बहुमत सुयाके दइ वंहे सरकार गठन याइगु धयादिल ।
