बजेट संसदं हे पारित याकेगु प्रमया धापू
एकीकृत नेकपा (माओवादीं) संसद् न्ह्याके मबिइवं अध्यादेशं बजेट हयेगु खँ जुयाच्वंगु इलय् प्रधानमन्त्री माधवकुमार नेपालं संसदं हे बजेट पारित याकेत पहल यायेगु धयादीगु दु ।
थौं सुथय् बालुवाटारय् संविधानसभाया नायः सुवासचन्द्र नेम्वाङनाप नापलायेधुंकाः प्रधानमन्त्री नेपालं संसदं हे बजेट पारित याकेत पहल यायेगु धयादीगु खः । प्रधानमन्त्री नेपाल व संविधानसभा नायः नेम्वाङ दथुइ नापलायेगु झ्वलय् बजेट पारित मजुया देश आर्थिक संकटय् लाःगुलिं पंगः चीकाः बजेट पास याकेगु उपायया बिषयसं सहलह जूगु खः ।
नापलायेगु झ्वलय् नायः नेम्वाङं दलतय्त जिम्मेवार जुया सहमति कायम यानाः संसदं हे बजेट पारित याकेगु लकस दयेकेत प्रधानमन्त्रीयात छ्याता बियादिल । संसद्या कार्यव्यवस्था समितिं विनियोजन विधेयकय् संसद्य् सहलह यायेगु निर्णय याःसां माओवादी पंगःया हुनिं बजेट पास याके मफूगु नेम्वाङया धापू दु ।
माओवादीं नागरिक सर्वोच्चता कायम यायेत माग यानाः साउन २२ गते निसें मदिक्क संसद्य् पंगः थनावयाच्वंगु खः । पंगःया हुनिं संसद्य् बजेट सहलह तकं जुइमफूनि । कात्तिक मसान्त तक बजेट पारित मजुलधाःसा सरकारी ज्याकुथिइ आर्थिक कारोवार ठप्प जुइ ।
