माओवादीं आन्दोलनया ज्याझ्वः घोषणा
राजनीतिक सहमतिया निंतिं सरकारयात कार्तिक १५ गते तक ब्यूगु ई दुने नं सहमति मजुसाः माओवादीं कार्तिक १५ गते निसें हे निक्वःगु चरणया आन्दोलन याइगु जूगु दु । स्थानीय निसें केन्द्र तक सरकारया प्रशासमित ज्याकूत घेराउ व धर्ना नापं राजधानीयात नाकाबन्दी यायेगु तकया आन्दोलनया ज्याझ्वः माओवादीं घोषणा याःगु दु ।
माओवादीया संयुक्त राष्ट्रिय जनआन्दोलन समितिया बैठक लिपाः मंगलवाः याःगु पत्रकार सम्मेलनय् कार्तिक १५ निसें २७ गते तक निक्वःगु चरणया विरोध ज्याझ्वः घोषणा याःगु खः ।
माओवादीं घोषणा याःगु आन्दोलनया ज्याझ्वः कथं १५ गते देयन्यंक मसाल जुलुस पिकायेगु, १६ गते गाविस व नगरपालिकाया भवनय् ज्याकू ई बछि घेराउ यायेगु, १८ व १९ जिल्ला प्रशासन ज्याकू न्हिच्छि घेराउ यायेगु, २३ गते स्वायत्त गणराज्य घोषणा यायेगु, २४ गते स्वनिगःलय् नकाबन्दी यायेगु व २६ व २७ गते सिंहदरवार निन्हु तक घेरे यानाः प्रधानमन्त्री, मन्त्री लगायत सुयातं दुने दुहांवनेमबीगु ज्याझ्वः घोषणा याःगु दु ।
पत्रकार सम्मेलनय् माओवादी उपाध्यक्ष व संयुक्त राष्ट्रिय जनआन्दोलन समितिया संयोजक डा. बाबुराम भट्टराईं राष्ट्रिय स्वाधिनता व वैदेशिक हस्तक्षेप विरुद्ध निक्वःगु चरणया विरोध ज्याझ्वः यायेत्यनाःगु कनादिल । वयेकलं आन्दोलन शान्तिपूर्ण जुइगु नं धयादिल ।
वयेकलं माओवादीं नागरिक सर्वोच्चताया मुद्दायात मत्वःतुगु स्पष्ट यानादिसें नागरिक सर्वोच्चत पलिस्था जुइधुंका जक सरकार हिलेगु खँ वइगु धयादिल ।
प्रधानसेनापतिया थमौति बित राष्ट्रपति डा. रामवरण यादवं ल्ह्वंगु पलाखं देशय् निगू सत्ता स्थापना जूगु व राष्ट्रपतिं संविधानय् मदुगु अधिकार छ्यलाः अंसवैधानि अधिकार पाखें नागरिक सर्वोच्चता हनन् याःगु धासें माओवादीं आन्दोलन यानावयाच्वंगु खः ।
