ईलय् हे व्यवहार सुधार यायेत माओवादीयात देउवाया ख्याच्वः
नेपाली कांग्रेसया वरिष्ठ नेत शेरबहादुर देउवां धम्की बिया मेपिंत ख्याइपिं माओवादी थःगु हे कारणं पतन जुइगु दाबी यानादीगु दु । वयेकलं ईलय् हे थःगु व्यवहारय् सुधार यायेत माओवादी यात ख्याच्वः नं बियादीगु दु ।
कांग्रेस भातृ संगठन तरुण दलया स्थापना दिवसया लसताय् चितवनय् जूगु विशेष ज्याझ्वलय् न्ववानादिसें वयेकलं माओवादीया धम्कीया छुं औचित्य मदुगु व थंज्याःगु हे व्यवहारं राजनीतिक निकास नं पिहामवइगु धयादिल ।
पुलांम्ह प्रधानमन्त्री नं जुयादिम्ह नेता देउवां छखे सहमति व सम्वाद पाखें निकास पिकायेगु धकाः न्ववानाजुइगु व मखे कानुनया खिलाफ आन्दोलन यानाजुइगु धासें माओवादीया पह प्रति अपात्ति प्वंकादिल । वयेकलं हनिमय् कानुन विपरीतया आन्दोलन गब्लें नं सफल मजुइगु दाबी नं यानादिल ।
ज्याझ्वलय् सिंचाई मन्त्री बालकृष्ण खाँडं माओवादी अराजकता पाखे वनाः गल्ती यानाच्वंगु धयादिल । वयॆकलं सहमति यायेमाःगु ईलय् माओवादी झन् अराजक जुयावनाच्वंगु धयादिसें थंज्याःगु हे पह खसाः सरकार सुम्क मच्वनीगु ख्याच्वः बियादिल ।
थ्वस्वयां न्ह्य: ज्याझ्वलय् ब्वति कायेत झायाच्वंम्ह नेता देउवा गयावःगु गाडीइ माओवादीं आक्रमण याःगु खसाः चितवनया थीथी थासय् माओवादीया कार्यकर्तात व तरुण दलया कार्यकर्तात दथुइ मुठभेदया स्थिति वःगुलिं ज्याझ्वःया ईलय् अनया सुरक्षा स्थिति तसकं कडा नापं व्यापक सुरक्षाकर्मीत परिचालन याःगु खः ।
