संघीय राज्य माग यासें पूर्वाञ्चल ठप्प
येँ (सन्ध्या टाइम्स)/ लिम्बुवान संघीय परिषद् व सरकार दथुइ जूगु सहमति कार्यान्वयन यायेमाःगु माग यासें थौं स्वायत्त लिम्बुवान परिषदं पूर्वया गुंगू जिल्ला बन्द याःगु दु।
वंगु चैत्र ६ गते सरकार व लिम्बुवान परिषद् दथुइ जूगु न्यागू बुँदाया सहमतियात कार्यान्वयन यायेमाःगु माग यासें थ्व बन्द याःगु खः ।
परिषदं आन्दोलनया झ्वलय् सीम्ह थः कार्यकर्ता अनिलकुमार तामाङयात सहिद घोषणा यायेमाःगु, घाःपाः जूपिं कार्यकर्ताया उपचारया निंतिं सरकारं ग्वाहालि यायेमाःगु, लिम्बुवान प्रदेशया घोषणा यायेमाःगु आदि माग नं याःगु दु ।
लिम्बुवानया बन्दं यानाः पूर्वया ताप्लेजुङ्ग, इलाम, पाँचथर, धरान, झापा, तेर्हथुम, मोरङ्ग, सुनसरी, भोजपुर व संखुवासभाया फुक्क लागा पूर्ण रुपं ठप्प जुयाच्वंगु दु।
उगु लागाया यातायात, शिक्षण संस्था, कलकारखाना बजाः पूर्ण रुपं बन्द जुयाच्वंगु दु ।
बन्दं यानाः पूर्व पश्चिम राजमार्गय् सवारी साधन चले जुइ मफयाः आपालं यात्रुत अलपत्रय् लानाच्वंगु दु। बन्द आह्वानकर्तातय्सं अनया थीथी थासय् प्रदर्शन नं यानाच्वंगु दु ।
