'अध्यादेशपाखें जूसां बजेट हयेमाः'
येँ (सन्ध्या टाइम्स)/सभामुख सुवास नेम्वाङं विशेष अधिकार छ्यलाः जूसां नं बजेट पारित याकेमाःगु खँ नेपाली कांग्रेसया केन्द्रीय दुजः व पुलांम्ह अर्थमन्त्री रामशरण महतं धयादीगु दु ।
प्रेस युनियन कास्कीं थौं सुथय् ग्वसाः ग्वःगु पत्रकार सम्मेलनय् न्ववासें वय्कलं माओवादीं लगातार सदन अवरुद्ध यानाच्वन धाःसा अध्यादेशपाखें जूसां बजेट पारित याये फइगु खँ नं धयादीगु दु ।
'नागरिक सर्वोच्चताया नामय् लगातार सदन अवरुद्ध यानाच्वन धाःसा सभाध्यक्ष नेम्वाङ थःगु विशेष अधिकार छ्यलाः बजेट पारित याकेमाः मखुसा अध्यादेशं जूसां बजेट पारित यायेफइ' वय्कलं धयादिल ।
माओवादीं याये धाःगु आन्दोलनं न्ह्याक्व हे तःधंगु रुप काःसां सरकार गुगुं नं हालतय् क्वःदली मखु धासें वय्कलं माओवादीयात फुसा ३०१ म्ह सभासद् खाकाः सरकार क्वःथलेत हाथ्या नं बियादिल ।
उखे सभामुख नेम्वाङं छुं ई न्ह्यः जक सूचना तथा सञ्चारमन्त्रीलिसे खँ ल्हायेगु झ्वलय् थम्हं सदन बाहेक मेथासं बजेट पारित याके मफइगु खँ धयादीगु खः ।
