माओवादीया सरकार नं क्वःथलेगु जुइ: गच्छदार
येँ (सन्ध्या टाइम्स)/ सरकार परिवर्तन यानाः माओवादीया नेतृत्वय् मेगु सरकार दयेकल धाःसा मधेशवादी दलतय्सं सदन अवरुद्ध यायेगु ख्याच्वः उपप्रधानमन्त्री विजयकुमार गच्छदारं बियादीगु दु ।
रिपोर्टर्स क्लब लुम्बिनीं ग्वसाः ग्वःगु साक्षात्कार ज्याझ्वलय् न्ववासें वय्कलं उगु खँ धयादीगु खः। वय्कलं विधिसम्मत ढंगं सदनया बहुमत कयाः गठन जूगु सरकार विरुद्ध सदन अवरुद्ध यानाः माओवादीं थःगु सरकार गठन याये चाहे जूगु खःसा आः संसद घेरे यायेत मधेशवादी दलत नं लिमचिलेगु दावी यानादिल ।
अलोकतान्त्रिक ढंगं सरकार गठन जुल धाःसा अज्याःगु सरकारयात मधेशी सभासदत छप्पँ जुयाः क्वःथलेगु खँ नं वय्कलं धयादिल ।
आःया सरकार हे राष्ट्रिय सरकार खः धासें उपप्रम गच्छदारं बहुमतया सरकारयात बन्धक दयेकाः माओवादीं गज्याःगु लोकतन्त्र चाहे जूगु खः न्ह्यसः नं तयादिल ।
वय्कलं यदि इलय् हे संविधान दयेकेगु ज्या मजुल धाःसा उकिया फुक्कं दोष माओवादीं हे फये मालीगु ख्याच्वः नं बियादिल ।
