सकिमिला पुन्हिकुन्हु 'भक्तपुर नाइट'

ख्वप (सन्ध्या टाइम्स)/ ख्वप जिल्लायात पर्यटकीय नगरी दयेकेगु उद्देश्य तयाः भक्तपुर पर्यटन विकास समितिं वइगु कार्तिक १६ गते सकिमिला पुन्हिकुन्हु ख्वपया लाय्कुलि 'भक्तपुर नाइट' ज्याझ्वः याइगु जूगु दु। ख्वपय् बहनीया पर्यटक अप्वयेकेगु ताः तयाः थुगु गुक्वःगु 'भक्तपुर नाइट' ज्याझ्वः याये त्यनागु खँ भक्तपुर पर्यटन विकास समितिं पत्रकार सम्मेलन यानाः जानकारी बिउगु दु। नेवाः नखःचखः प्रचार यानाः पर्यटकतय्त आकर्षित यायेगु ताः तयाः थुगु ज्याझ्वः याये त्यनागु खँ पत्रकार सम्मेलनय् धाःगु दु।
महोत्सवय् पर्यटकतय्त नेवाः नसा ज्वलं नकेगु नापं नेवाःतय् परम्परागत नेवाः सांस्कृतिक बाजं व प्याखं नं क्यनी। भक्तपुर पर्यटन विकास समितिया अध्यक्ष नवलकिशोर राजभण्डारीं बियादीगु जानकारी कथं पर्यटकतय्त उकुन्हु टौमढी व थीथी थासय् ब्वयातइगु हलिमलि नं क्यनीगु ज्याझ्वः दु ।