नेप्से कुहां वयेगु क्रम जारी
येँ (सन्ध्या टाइम्स)/नेपाल स्टक एक्सचेन्जय् थ्व वाःया न्हापांगु न्हि जूगु शेयर कारोबारं ६ सय अंकं क्वय् कुहां वंगु नेप्से परिसुचक म्हिगः नं कुहां वन। कारोबार न्ह्याःगु बाघौ तक स्थिर जूगु परिसुचक वयां लिपा मदिक्क कुहां वनेवं म्हिगः जूगु कारोबारं नेप्से ४ दशमलव १ अंकं कुहां वनाः ५९५ दशमलव ३३ अंकय् थ्यंगु दु। अथे हे सेन्सेटिभ नं १ दशमलव ४१ अंकं व फ्लोट शुन्य दशमलव ५ अंकं कुहां वंगु दु। शेयर बजाः निरन्तर कुहां वयाच्वंगु कारणं थुकिया लगानी कर्तात नं निराश जुयाच्वंगु दु। झण्डै निदँ लिपा थुकथं नेप्से ६ अंकं कुहां वंगु खः ।
स्वन्ति नखः लिपा नेप्सेय् जुयाच्वंगु शेयर कारोबारं गति काये फयाच्वंगु मदुनि। वाणिज्य समुहया कारोबारं कुहां वयाच्वंगु कारणं नेप्से नं लगातार कुहां वनाच्वंगु दु। छन्हु न्ह्यः नं वाणिज्य समुह कारणं कुहां वंगु नेप्से म्हिगः नं वाणिज्य व जलविद्युत समुहया कारोबारय् वःगु र्हास मुख्य कारण जुल। नेप्सेय् अप्वः प्रभाव लाकीगु मू मू बैंकत स्टायण्डर्ड चार्टर्ड, नविल बैंक, एभरेष्ट बैंक लगायतया आपालं वाणिज्य बैंकया कारोबार कुहां वयेवं नेप्से म्हिगः नं कुहां वःगु खः ।
वाणिज्य समुहया उपसुचक ६ दशमलव ५८ अंकं कुहां वयाः ५७९ दशमलव २६ अंकय् थ्यंगु दु। छन्हु न्ह्यः दकलय् अप्वः झण्डै १३ अंकं थहां वंगु जलविद्युत समुह म्हिगः धाःसा दकलय् अप्वः ७ दशमलव ४७ अंकं कुहां वयाः ८२५ दशमलव ७४ अंकय् थ्यंगु दु। विकास बैंक समुह नं १ दशमलव ४८ अंकं कुहां वयाः ६४७ दशमलव ८८ अंकय् थ्यंगु दु। फाइनान्स समुहया उपसुचक ३ दशमलव ११ अंकं कुहां वयेवं ६२१ दशमलव ८१ अंकय् थ्यंगु दु ।
मेखे म्हिगः जूगु कारोबारं व्यापार समुह ४ दशमलव ८ अंकं थहां वनाः २६१ दशमलव २१ अंकय् थ्यंगु दु। अथे हे अन्य समुह नं १ दशमलव १७ अंकं थहां वनाः ६३५ दशमलव ६२ अंकय् थ्यन ।
नेपाल स्टक एक्सचेन्जया कथं म्हिगः ९०, ३७० कित्ता शेयर न्याये-मी जुयाः न्यागू करोड न्हय्गूगु लाख व ख्वीप्यद्वः तका दांया कारोबार जुल। कारोबार जूगु कम्पनी मध्ये दकलय् अप्वः दांया ल्याखं स्टायण्डर्ड चार्टर्ड बैंकं ख्वीखुगू लाख झिंनिद्वः तका दांया कारोबार याःगु दु। मर्चेण्ट फाइनान्स कम्पनीं दकलय् अप्वः कमे याःगु दुसा अपी फाइनान्स कम्पनीं दकलय् अप्वः द्यापं फयेमाःगु दु।
नेप्सेया कथं स्वीप्यंगू कम्पनीया कारोबार कुहां वंगु दुसा झिंन्यागू कम्पनीया जक शेयर भाः थहां वंगु दु। ल्यं दुगु झिगू कम्पनीया शेयर भाः यथावत हे जुल ।
