धुँ सम्मेलन थनिनिसें येँ सुरु

प्रधानमन्त्री माधवकुमार नेपालं लोपोन्मुख वन्यजन्तु संरक्षणया निंतिं अन्तरदेशीय नो बाउन्ड्री एरिया पलिस्थाया प्रस्ताव यानादीगु दु । येँ थनिनिसें न्ह्याःगु विश्व बाघ कार्यशाला उलेज्या यानादिसें प्रधानमन्त्री नेपालं बन्यजन्तुया बासस्थानय् छुं कथं निश्चित परिधि क्वःछिइमज्यूगु धयादिसें याकनं हे नेपाल व भारत दथुइ नो बाउन्ड्री अवधारणा लागू जुइगु बिश्वास प्वंकादिल । आवश्यक कानून दयेका लोपोन्मुख वन्यजन्तु संरक्षण यायेगु प्रतिबद्धता नं प्रधानमन्त्रीं प्वंकादिल ।


वन तथा भू-संरक्षण मन्त्रालयया ग्वसालय् विश्व बाघ मञ्च, साइटिस सचिवालय, ग्लोबल टाइगर इनिसियटिभ, विश्व बैंक, सेभ द टाइगर फण्ड, राष्ट्रिय प्रकृति संरक्षण कोष व विश्व वन्यजन्तु कोष नेपालया ग्वाहालिइ प्यन्हू तक सम्मेलन जुइत्यंगु खः । धुँ दुगु देय्या नापं धुँ संरक्षणय् कि्रयाशील राष्ट्रिय अन्तराष्ट्रिय सरकारी नापं गैर-सरकारी संस्थाया निसः स्वयां अप्वः प्रतिनिधीं सम्मेलनय् ब्वति कयाच्वंगु दु । धुँया ल्याः अप्वयेकेत न्ह्याकेमाःगु पलाःया बारे कार्यशालां रणनीति दयेकी । नेपाल सरकारं थौं हे गौरीशंकर क्षेत्रयात संरक्षीत क्षेत्र घोषणा याःगु दु । थ्व नापं आः नेपालय् संरक्षण क्षेत्रया ल्याः झिंस्वंगु थ्यंगु दु । वन मन्त्री दिपक बोहोरां बर्दिया राष्ट्रिय निकुञ्जया क्षेत्र अप्वयेका गुद्वः वर्ग किलोमिटर दयेकागु जानकारी नं बियादिल । सरकारं बन्यजन्तुया अबैध चोरी सिकारी नियन्त्रण यायेत अर्धन्यायिक एन्टी पोचिङ् सेल घोषणा नं याःगु दु । कार्यशालां अन्तराष्ट्रिय बाघ संरक्षणय् अवलम्बन याःगु कार्ययोजना व अनुभव समिक्षा यानाः न्हूगु रणनीति तयार याइ ।