माओवादी नायःपाखें एमालेयात राष्ट्रिय सहमतिया सरकारया प्रस्ताव

एकीकृत नेकपा (माओवादी)या नायः पुष्पकमल दाहालं राष्ट्रिय सहमतिया सरकारया प्रस्ताव तयादीगु दु । एमाले संसदीय दलया ज्याकू सिंहदरवारय् थौं एमाले नायः झलनाथ खनालनाप जूगु नापलायेगु ज्याझ्वलय् नायः दाहालं थुकथं प्रस्ताव तयादीगु खः । माओवादीं माधव नेपालया विकल्प मालेगु स्वयां राष्ट्रिय सहमतिया सरकार एमालेया हे नेतृत्वय् जूसां मान्य जुइगु धाःगु सीदुगु दु । नापलायेगु ज्याझ्वः लिपा नायः खनालं राष्ट्रिय सरकार निर्माण थःपिनिगु नं एजेन्डा जूगु धयादिसें बहुमतया सरकार बाध्यात्मक जक जूगु धयादिल । राष्ट्रिय सरकारया नेतृत्व सुना यायेगु धैगु बिषयसं धाःसा निम्ह नेतातय्सं छुं मधाः । राष्ट्रिय सरकार गठनया निंतिं सहलह यायेत थौं हे स्वंगु दलया शीर्ष नेतातय्गु मुँज्या च्वनेगु सहमति जूगु दु । थ्यंमथ्यं घौछिया सहलहखे एमालेपाखें नायः झलनाथ खनालया नापं मू छ्याँज्ये ईश्वर पोखरेल, छ्याञ्जे युवराज ज्ञवाली, केशव बडाल अथेहे माओवादीया पाखें नायः दाहाल व न्वकू नारायणकाजी श्रेष्ठं ब्वति कयादीगु खः ।