'सरकर हिलेत स्वसा: मधेशवादी दलतय्सं संसद अवरुद्ध याइगु'
मधेशी जनअधिकार फोरम (लोकतान्त्रिक)या अध्यक्ष नापं उपप्रधानमन्त्री विजयकुमार गच्छदारं संसदय् अवरोध यानाः सरकार हिलेगु ज्याय् एकीकृत नेकपा (माओवादी) लगेजुयाच्वंगु दाबी यानादीगु दु । वयेकलं अथे यानाः माओवादी नेतृत्वया सरकार गठन जुसाः अज्याःगु सरकारयात क्वथलेत मधेशवादी दलतय्सं संसद अवरोध यायेगु खँ धयादीगु दु ।
रिपोर्टस क्लब नेपाल लुम्बिनी समन्वय समितिं मंगलवाः भैरहवाय् याःगु साक्षात्कार ज्याझ्वलय् न्ववानादिसें गच्छदारं विधि सम्वद्ध रुपं बहुमत प्राप्त यानाः गठन जूगु सरकार विरुद्ध संसद अवरोध यानाः सरकार गठन यायेत माओवादीं स्वःगु खसाः संसद अवरोध यायेत मधेशवादी सभासद्त नं न्ह्यने सरे जुइगु धयादिल ।
वयेकलं लोकतान्त्रिक विधिपाखें समस्या समाधान यायेत माओवादी इच्छुक मजूगु द्वपं बियादिसें यदि संविधानसभा पाखें निकास मालेत माओवादी तयार मजूसाः जनताया दथुइ जनमत संग्रह यानाः निकास मलेमाःगु बिचाः प्वंकादिल ।
