बहुमतं अवरुद संसद चायेकेगु : महत
नेपाली कांग्रेसया केन्द्रीय दुजः रामशरण महतं अवरुद्ध संसदयात संसदया बहुमत खाका चायेकेगु खँ धयादीगु दु ।
मंगलवाः सुथाय् प्रेस युनियन कास्कीं ग्वसाःग्वःगु पत्रकार सम्मेलनय् वयेकलं शान्ति प्रकृयाय् बाधक जुया माओवादीं संसद अवरुद्ध यायेगु ज्या याःगु धयादिसें संवैधानिक व वैद्यानिक तरिकां अवरुद्ध संसदयात याकनं हे सुचारु यायेगु धयादिल ।
वयेकलं छगू पार्टीं यानाः आम जनताया सः बन्धक जुइमफइगु धयादिसें सभामुखं अध्यादेश मार्फत संविधानं ब्यूगु अधिकार छ्यलाः जुसां संसद तत्काल चायेकाः बजेट पारित यायेमाःगु बिचाः प्वंकादिल ।
पुलांम्ह अर्थमन्त्री नं जुयादिम्ह नेता महतं राजनीतिक गतिरोधया मू दोषी माओवादी जूगु दाबी यानादिसें माओवादीया आन्दोलन नागरिक सर्वोच्चताया निंतिं मजुसें सत्ता प्राप्तिया निंतिं जूगु धयादिल । वयेकलं माओवादी नाप शान्तिवार्ता व संवैधानि प्रकृयाय् वयेगु बाहेक मेगू विकल्प मदुगु धयादिल ।
संविधान निर्माण, शान्ति प्रकृया व आर्थिक समुन्नत आःया मू एजेन्डा जूगु धयादिसें नेता महतं थुकी जिम्मेवार जुइत माओवादी यात इनाप यानादिल ।
