बैठकय् एमाले मवयेवं छुं सहमति जुइमफुत
वर्तमान रजनीतिक समस्याया समाधान मालेत च्वंगु सत्ता साझेदार दलतय् बैठकय् सत्ता नेतृत्व यानाच्वंगु दल नेकपा (एमालें) ब्वति मकायेवं बैठकं छुं निर्णय यायेमफुत ।
प्रमुख प्रतिपक्षी दल एकीकृत नेकपा (माओवादीं) राजनीतिक समाधानया निंतिं सरकार हिलेमाःगु न्हूगु माग तयेवं नेपाली कांग्रेसं थुकीया बारे सहलह यायेत सत्ता साझेदार दलतय् बैठक आव्हान याःगु खः । बैठकय् झिंच्यागू दलयात ब्वनातःगु खसां एमाले सहित मेगू निगू दलं नं ब्वति मकाःगु खः ।
एमालें सत्ता सझेदार झिंच्यागू दलत नाप सहलह यायेस्वयां न्ह्यः थुकीया बारे माओवादी नाप सहलह यायेगु शर्त कांग्रेस नाप तःगुलिं बैठकय् एमाले अनुपस्थित जूगु खँ कांग्रेस प्रवक्ता अर्जुननरिसंह केसीं कनादिल । वयेकलं धयादिल, - 'एमाले न्हापा माओवादी नाप सहलह यानाः जक सत्ता साझेदार दलत नाप सहलह याये धइगु पक्ष दु ।'
थ्वस्वयां न्ह्यः कांग्रेस व एमाले दथुइ सोमवाः सुथय् एमाले ज्याकू बल्खुइ जूगु सहलहलय् माओवादीयात लिप्पांगु पटक सहमतिलय् वयेत इनाप यायेगु निर्णय याःगु खः ।
