क्रान्तियात पूवंकेगु माओवादी अध्यक्षया धापू
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' न्हापा थें संकटकाल लागू यानाः थःपिनि छ्यँया ध्याबा ताके यायेगु षड्यन्त्र जुयाच्वंगु दाबी यानादिसें उकीया प्रतिरोध यायेत दक्वं रुपं थःपिं तयार जूगु खँ धयादीगु दु ।
पार्टीया येँ निर्वाचन क्षेत्र नं ७ पाखें न्हू बजारय् सोमवाः याःगु छगू ज्याझ्वलय् न्ववानादिसें अध्यक्ष प्रचण्डं इतिहासय् ल्यँ दनीगु क्रान्तियात थःपिंसं पूवंकेगु दाबी यानादिल । वयेकलं न्हापा निर्मम सैनिक दमनं जनताया परिवर्तनया आकांक्षायात कुण्ठित यायेगु म्हगस खंकूपिं संकटकालया नायःतय्सं आः नं अज्याःगु हे म्हगस खंकाः च्वंगु द्वपं बियादल । वयेकलं न्हापा नं अज्याःगु ज्या सम्भव मजूगु व थौं नं सम्भव मजुइगु दाबी यानादिसें वयेकलं अज्याःगु ज्या जूसा उकीया प्रतिरोध यायेगु ख्याच्वः बियादिल ।
वयेकलं माओवादीं याये धाःगु आन्दोलन स्वक्वःगु जनआन्दोलन जुइगु धयादिसें उकीं न्हापा ल्यं दनीगु क्रान्तियात नं पूवंकीगु दाबी यानादिल । वयेकलं परिवर्तनयात दिकेत स्वःसा याकनं हे क्रान्ति जुइगु व उगु क्रान्तियात हनिमयया गु नं शक्तिं पनेमफइगु दाबी यानादिल ।
माओवादी अध्यक्ष प्रचण्डं रक्षामन्त्री विद्या भण्डारीं धाः थें शान्ति सम्झौता संशोधन यायेत सम्भव मजूगु धयादिसें वयेकया धापू थें जूसा: देशय् दुर्घटना जुइगु धयादिल ।
