थौं स्वम्ह शीर्ष नेतातय् मुँज्या
येँ (सन्ध्या टाइम्स)/ स्वंगू दलया म्हिगः च्वंगु कार्य दलया बैठकय् माओवादीं हःगु न्हूगु प्रस्तावयात कयाः थौं स्वंगू दलया शीर्ष नेतातय् दथुइ बैठक च्वनेत्यंगु दु ।
कांग्रेस प्रवक्ता अर्जुन नरसिंह केसीं कनादी कथं शीर्ष नेतातय् बैठक च्वनेगु निंतिं तयारी जुयाच्वंसां थाय् व ई धाःसा क्वःमजिउनि ।
बैठकय् माओवादी अध्यक्ष प्रचण्ड, कांग्रेस सभापति गिरिजाप्रसाद कोइराला व एमाले अध्यक्ष झलनाथ खनालं ब्वति कयादी ।
स्वंगू दलया कार्य दलया बैठकय् माओवादीं प्रधानसेनापति प्रकरणय् ल्ह्वंगु पलाःयात संकल्प प्रस्तावय् दुथ्याकेमाःगु वा माओवादीया नेतृत्वय् सरकार दयेकेगु, शान्ति प्रक्रियाया निष्कर्ष व संविधान दयेकेगु ज्यायात छगू हे प्याकेज दयेकाः न्ह्यब्वयेवं राजनीतिक गतिरोध अझ तच्वया वंगु खः। उकिया निंतिं प्रधानमन्त्रीं राजीनामा बीमाःगु माग नं माओवादीं याःगु खः ।
थ्वहे झ्वलय् थौं एमालें सरकारयात ग्वाहालि यानाच्वंगु झिंच्यागू पार्टीया बैठक नं सःतूगु दु। नेकां संसदीय ज्याकुथी च्वनीगु उगु बैठकय् माओवादीलिसे न्ह्यानाच्वंगु वार्ता बारे झिंच्यागू दलयात जानकारी बी ।
अथे हे थौं कांग्रेस, एमाले व माओवादी दथुइ बिस्कं बिस्कं बैठक च्वनाः सहलह यायेगु तयारी नं जुयाच्वंगु दु ।
