नेवाः राज्य सिमांकन यायेत मोटरसाइकल र्याली
येँ (सन्ध्या टाइम्स)/नेवाः स्वायत्त राज्यया सिमांकन यायेगु नेवाः राष्ट्रिय मुक्ति मोर्चा नेपाः व नेवाः मंकाः मुक्ति दबू एकता समायोजन समितिया ग्वसालय् वंगु शनिवाः येँया बसन्तुपुलिं छगू मोटरसाइकल र्याली जुल ।
एकीकृत माओवादीया अध्यक्ष पुष्पकमल दाहाल 'प्रचण्डं' उलेज्या यानाः न्ह्याःगु उगु मोटरसाइकल र्याली ख्वप, नाला, भ्वँत, धौख्यः, पन्ति, लाकुरे भञ्ज्याङ्ग, लुभु, यलया मंगलबजार, थक्वाः नौबिसे जुयाः शनिवाः कुन्हु टिष्टुङ्गय् थ्यंकः वंगु खः ।
येँनं न्ह्याःगु र्यालीयात ख्वप, नाला, धौख्यः व टिष्टुङ्गय् ख्येँ सगं बियाः तःजिक लसकुस याःगु खः ।
टिष्टुङ्गय् थ्यंकाः छगू सांस्कृतिक ज्याझ्वः व नेवाः भ्वय् नं याःगु खः। र्याली म्हिगः आइतवाः टिष्टुङ्गं येँय् थ्यंकः वःगु खः ।
नेवाः राष्ट्रिय मुक्ति मोर्चाया नायः हितमान शाक्य, न्वकु व सभासद दिलीप महर्जन, राजकाजी महर्जनपिं नं र्यालीइ दुथ्याःगु खः ।
र्यालीया उलेज्या यासें माओवादी अध्यक्ष प्रचण्डं जातीय मुक्तिया विरोधीतय्सं संघीय राज्य मबीत षडयन्त्र यानाच्वंगु द्वपं बियादीगु दु। उलेज्या ज्याझ्वलय् न्ववायेगु झ्वलय् वय्कलं परम्परावादी यथास्थितिवादीतय्सं जातीय स्वशासन बिल धाःसा देशय् गृहयुद्ध जुइ धासें जातीय स्वशासनया विरोध यानाच्वंगु द्वपं बियादिल ।
थःपिनि सरकारया इलय् नेपाल संवत्यात राष्ट्रिय मान्यता बियागु खँ न्ह्यथनादिसें वर्तमान सरकारं उकियात कार्यान्वयन मयाःगु द्वपं नं वय्कलं बियादिल। नेपाल संवत् राष्ट्रिय संवत् जूगुलिं उकियात कार्यान्वयन यायेगु निंतिं तःधंगु पार्टी जूगु नातां थःपिंसं पहल यायेगु खँ नं वय्कलं धयादीगु दु ।
वय्कलं नेपालय् छ्यलाच्वंगु विक्रम संवत्य् विदेशी हस्तक्षेपया गन्ध वः धासें उकियात विस्थापित यानाः नेपाल संवत्यात छ्यलेमाःगु थःगु पार्टीया धारणा जूगु खँ नं अन स्पष्ट यानादिल ।
