एड्स संक्रमिततय् मंकाः बुँज्या
येँ (सन्ध्या टाइम्स)/कास्कीया लेखनाथ नगरपालिका, पोखरां भचा उखे। एड्सं संक्रमित मनूत जक जानाः थौंकन्हय् मंकाः बुँज्या न्ह्याकाच्वंगु दु। एड्स जुल कि 'खत्तम' हे जुइ, म्वाइ हे मखु धकाः पिने न्यनाच्वंगु भ्रम मदयेकेत एड्सं कःपिं मनूत जक जानाः उगु मंकाः बुँज्या न्ह्याकूगु जुयाच्वन ।
स्थानीय सालडाँडाया आकुरा गां धाःथाय् करिब ३० रोपनी जग्गाय् उगु मंकाः बुँज्या जुयाच्वंगु दु। अन बुँ पालीपिं, बाली पीपिं, लः बीपिं फुक्क हे एड्स संक्रमितत। बाली जक मखु अन सा, म्येय्, दुगुचा लहीगु ज्या नं जुयाच्वंगु दु ।
अन नियमित रुपं छुं एड्स संक्रमिततय्सं ज्या यानाच्वंगु दु। तर अथे धकाः न्ह्याबलें उमिसं जक ज्या यायेमाः धइगु धाःसा मखु। एड्सं कयाः दिक्क जुयाच्वंपिं न्ह्याम्ह मनू वयाः ज्या याःसां जिउ। खास यानाः एड्सं कल कि समाजं याइगु हेला व दुर्व्यवहारपाखें मुक्त जुइगु लागिं उगु मंकाः बुँज्या न्ह्याकूगु खः। थन ज्या यानाः एड्स जूपिंसं नं समाजय् छुं यानाः क्यनेफु धकाः पुष्टि यायेगु लागं थःपिंसं थ्व ज्या न्ह्याकागु खँ उमिसं धाःगु दु ।
