ख्वपय् छक्वलं हे खुँ अप्वल
ख्वप (सन्ध्या टाइम्स)/ वंगु छुं दिं न्ह्यःनिसें ख्वपया थीथी थासय् खुँतय्गु सक्रियता अप्वयावंगु दु। मोहनि व स्वन्ति लिपा छक्वलं हे खुँत अप्वयावःगु खः। शनिवाः ५ वडा देकोचाय् च्वंगु स्वखा छेँय् छक्वलं हे दां, तिसावसः, मोवाइलया रिचार्ड कार्ड व क्यामेरा खुया यंकूगु दु। स्थानीय प्रेमकाजी खाइजूया छेँय् ताःफ्वः छ्यानाः अथे खुया यंकूगु खः ।
नापं लाःगु माधव त्यातःया छेँय् नं खुँय्सं नितोला लुँ, नीतोला ति वहः व झिंन्हय्द्वः दां खुया यंकूगु दु। वहे इलय् अन हे च्वंम्ह सानुकाजी देशय्मरुया छेँय् नं लुँया मंगलसुत्र व मुंद्री खुयायंकूगु दु ।
अथे हे ख्वप नगरपालिका वडा नं. - १५ इटाछेँय् च्वंगु कुस्को त्वालय् तुल्सीराम देशय्मरुया क्वथाय् यखानातःगु पाइन्टं निगू लाख ६० हजार दां खुया यंकूगु खँ नं सीदुगु दु। गार्मेन्ट उद्योगत बन्द जुजुं वनाच्वंगुलिं नं पिनें वयाच्वंपिं मनूतपाखें खुँज्या अप्वःगु अनुमान प्रहरीं याःगु दु ।
