सञ्चार माध्यमय् जंगली आक्रमण

थःपिनि विरुद्ध समाचार च्वल धकाः माओवादी समर्थित कार्यकर्तातय्सं 'हिमाल' खबरपत्रिकाया ज्याकुथी आक्रमण यानाः थःपिनि जंगली स्वभाव हानं छक्वः ब्वःगु दु । थ्व स्वयां न्ह्यः नं 'हिमाल' पत्रिका लाकाः मि तयेगु ज्या उमिसं यायेधुंकूगु खः । माओवादी कार्यकर्ताया थ्व ज्यायात न्ह्याक्व आलोचना याःसां गाइ मखु । थुकिं यानाः माओवादीं देशय् वःगु लोकतान्त्रिक हिउपाःयात अझ नं आत्मसात याये मफुनि व उपिं अझ नं जंगली बिचारं हे ग्रस्त जुयाच्वंगु दनि धइगु बांलाक हे क्यना बिउगु दु ।

साचार माध्यमय् थथे गुण्डागर्दी शैलीं आक्रमण यायेगु ज्या न्हापा शाही शासनया इलय् तकं मजू । गणतन्त्रय् थज्याःगु घटना जुइगु धइगु न्हूगु व्यवस्था प्रति जनतायात वितृष्ण यायेगु थें जक खः । गुगु पार्टी सत्ताय् दु उकिया हे भातृ संगठनत थथे गुण्डागर्दीइ कुहां वयेगु खःसा उकिं जनतायात निरीह व आतंकित याना बीगु स्वाभाविक खः । यदि माओवादी थः भातृ संगठनतय्सं यानाच्वंगु थज्याःगु ज्यायात नियन्त्रण मयायेगु खःसा थ्वहे माओवादीया अन्त्यया शुरुवात जुया बीगु खँय् शंका मदु । थुकियात नियन्त्रण यायेगु कर्पिनि लालिं मखु स्वयम् माओवादीया लालिं अत्यावश्यक खः । थ्व प्रवृत्तिं माओवादीयात जनताया पार्टी मखु गुण्डातय् पार्टी दयेका बीगु खतरा दु । थःगु संगठन दुने अन्य तत्व घुसपैठ जूगुलिं थथे जूगु धायेवं पार जुइ मखु । घुसपैठ जूगु खःसा उमित कानुनी व माओवादीया सांगठनिक कारवाही नं मयासें मगाः । माओवादी कार्यकर्तां देशया शान्ति सुरक्षा व औद्योगिकख्यःयात आतंकित यानातःगु ला चर्चाय् न्हापा हे दुगु जुल । उकियात पनेगु सिबें विस्तार यायेगु ज्याय् उपिं लगे जुयाच्वंगु आभास थुकिं बिउगु दु ।

More Stories Like this