चांगान बौद्ध सम्मेलनय् भिक्षु अश्वघोष
येँ (सन्ध्या टाइम्स)/चीनया सियान प्रान्तय् जुइगु चांगान बौद्ध धर्म सम्बन्धी न्हापांगु सम्मेलनय् ब्वति कायेत नेपाःपाखें संघउपनायक भिक्षु अश्वघोष महास्थविरया नेतृत्वय् छगू पुचः उखे वंगु दु। थ्वहे वइगु अक्टोबर २८ निसें ३१ तारिख तक उगु सम्मेलन न्ह्याइ ।
नेपाःया प्रतिनिधि मण्डलय् थौंकन्हय् विश्वया थीथी देय्या बुद्ध धर्म बारे अध्ययन यानाच्वनादीम्ह विद्वान हिरण्यलाल श्रेष्ठ व चीनया लागिं नेपाःया राजदूत टंक कार्की नं दुथ्याः।
न्हापांगु सहस्राव्दीपाखे चीनया राजधानी जुयाच्वंगु चांगान धइगु थ्व थाय् उगु ईया विश्वय् हे नांजाःगु बौद्ध केन्द्र खः। चांगानया हे वर्तमान नां सियान जूवंगु खः। नांजाःम्ह चिनियाँ यात्री हुयेन साङ्गं करिब निद्वःदँ न्ह्यः लुम्बिनी भ्रमण यानाः च्वयातःगु यात्रा विवरण सम्बन्धी दस्तावेज थन हे सुरक्षित यानातःगु दु ।
