कन्हसंनिसें येँय् विश्व धुँ कार्यशाला
येँ (सन्ध्या टाइम्स)/ कन्हसंनिसें येँय् विश्व धुँ कार्यशाला जुइगु जूगु दु। विश्वं लोप जुया वनेत्यंपिं धुँतय्त बचे यायेगु ताः तयाः जुइत्यंगु थुगु कार्यशालाया उलेज्या कन्हय् प्रधानमन्त्री माधवकुमार नेपालं यानादी ।
नेपाल सरकारया वन तथा भू-संरक्षण मन्त्रालयया ग्वसालय् व विश्व धुँ मञ्च, साइटिस सचिवालय, ग्लोबल टाइगर इनिसियटिभ, विश्व बैंक, सेभ द टाइगर फण्ड, राष्ट्रिय प्रकृति संरक्षण कोष व डब्लुडब्लुएफ नेपाःया ग्वाहालिइ जुइगु कार्यशाला कार्तिक १३ तक न्ह्याइ ।
धुँ दइगु देय्या नापं धुँ संरक्षणय् क्रियाशील राष्ट्रिय अन्तर्राष्ट्रिय सरकारी तथा गैर सरकारी संस्थाया निसः स्वयां अप्वः नीति निर्माता, निर्णयकर्ता, वैज्ञानिक व संरक्षण विद्तय्सं थुगु कार्यशालाय् ब्वति काइगु खँ म्हिगः छगू पत्रकार सम्मेलन यासें थुकिया जानकारी बिउगु खः ।
राष्ट्रिय निकुन्ज तथा वन्यजन्तु संरक्षण विभागय् जूगु छगू पत्रकार सम्मेलनय् वन तथा भू संरक्षण मन्त्री दिपक बोहरां थुकिया जानकारी बीगु लिसें पत्रकार सम्मेलनय् न्यंगु थीथी न्ह्यसःया लिसः मन्त्री बोहरा, विभागया निर्देशक गोपाल प्रसाद उपाध्याय, सेभ द टाइगरया नायः महेन्द्र श्रेष्ठ आदिपिंसं बियादीगु खः ।
