अवरुद्ध संसद सूचारु जुइगु सभाध्यक्षया विश्वास

संविधानसभाया अध्यक्ष सुवाषचन्द्र नेम्वाङं प्रमुख राजनीतिक दलत दथुइ न्ह्यानाच्वंगु संवादया राजनीतिं ताः ई न्ह्यः निसें अवरुद्ध संसद याकनं सूचारु जुइगु विश्वास प्वंकादीगु दु ।

सोमवाः तनहुँलय् जनज्योति क्याम्पसया ग्वाहालि न्ह्याःगु श्रीमदभागवत सप्ताहज्ञान महायज्ञया उल्लेज्या यानादिसें वयेकलं सहमति पाखें हे समस्या समाधान जुइगु धयादिल । वयेकलं स्वंगू प्रमखु दलत दथुइ जुयाच्वंगु सहमतिया कुतः ताः लानाः संसद सूचारु जुइगु विश्वास प्वंकादील ।

वयेकलं दलत मिले जुया न्ह्याः वनेगुया विकल्प मदुगु धयादिसें न्ह्याथे यानाः जुसां दक्वं विवादया विषयत समाधान यानाः सम्झदारी यायेमाः धयादिल । वयेकलं दलत दथुइया असमझदारीया कारणं संविधान ईलय् हे च्वये मफइगुलिं संविधान निर्माण यायेत जुसां दलत मिलेजुइमाःगु बिचा: प्वंकादिल ।